ເປີດ ໂຮງງານ ຜະລິດ-ໄຟຟ້າພະລັງງານແສງຕາເວັນແຫ່ງທຳອິດໃນ ສປປ ລາວ.
ໃນວັນທີ 7 ກຸມພາ 2017, ບໍລິສັດ ຜະລິດ-ໄຟຟ້າລາວ ມະຫາຊົນ ແລະ ບໍລິສັດ ພັດທະນາພະລັງງານບໍລິສຸດ ຈໍາກັດຜູ້ດຽວ ໄດ້ຮ່ວມກັນຈັດພິທີເປີດ ໂຮງງານ ຜະລິດ-ໄຟຟ້າພະລັງງານແສງຕາເວັນແຫ່ງທຳອິດໃນ ສປປ ລາວ ຢ່າງເປັນທາງການ ໂດຍການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງີນ, ເຊິ່ງໂຄງການດັ່ງກ່າວ ຕັ້ງຢູ່ບ້ານແຈ້ງສະຫວ່າງ ເມືອງນາຊາຍທອງ ນະຄອນຫລວງວຽງຈັນ.
ເຂົ້າຮ່ວມໃນພິທີດັ່ງກ່າວ ຍັງໄດ້ຮັບກຽດເຂົ້າຮ່ວມໂດຍມີ ທ່ານ ປອ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່, ບັນດາທ່ານລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ ຈາກບັນດາກະຊວງທີ່ກ່ຽວຂ້ອງ ພ້ອມນີ້ຍັງມີທ່ານ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດ ໄຟຟ້າລາວ ພ້ອມດ້ວຍຄະນະ, ທ່ານ ລັດຕະນາ ປະທຸມວັນ ຜູ້ອໍານວຍການໃຫຍ່ ບໍລິສັດ ຜະລິດ-ໄຟຟ້າລາວ ມະຫາຊົນ ພ້ອມດ້ວຍ ຄະນະສະພາບໍລິຫານ, ພະນັກງານຈາກ ບໍລິສັດ ຜະລິດ-ໄຟຟ້າລາວ ມະຫາຊົນ, ບັນດາທະນາຄານ ແລະ ສະຖາບັນການເງິນຕ່າງໆ, ພ້ອມດ້ວຍສື່ມວນຊົນ.
ໂຮງງານດັ່ງກ່າວເປັນໂຮງງານແຫ່ງທໍາອິດຂອງລາວ ທີ່ໄດ້ມີການນໍາໃຊ້ເຕັກນິກ ແລະ ເຕັກໂນໂລຊີທີ່ທັນສະໄໝ ເຊັ່ນ: ການໃຊ້ແຜ່ນໂຊລ່າ ຍີ່ຫໍ້ TALESUN ມີຂະໜາດ 320 ວັດຕໍ່ແຜງ ຈໍານວນທັງໝົດ 9.600 ແຜງ ເພື່ອເຊື່ອມຕໍ່ເຂົ້າໃນລະບົບສາຍສົ່ງ 22 ກິໂລໂວນ ຂອງລັດວິສາຫະກິດໄຟຟ້າລາວ ເຊິ່ງໂຄງການດັ່ງກ່າວນີ້ມີມູນຄ່າການລົງທຶນທັງໝົດ 3,445,306 ໂດລາສະຫະລັດ ຫຼື ປະມານ 27 ຕື້ກີບ ແລະ ໄດ້ເປີດການຜະລິດໄຟຟ້າໃນຕົ້ນເດືອນກຸມພາ 2017.
ພາຍຫລັງທີ່ມີການຄົ້ນຄວ້າ ແລະ ກະກຽມມາໄລຍະໜຶ່ງ ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ມີການລະດົມທຶນຈໍານວນໜຶ່ງເພື່ອມານໍາໃຊ້ເຂົ້າໃນການກໍ່ສ້າງຜະລິດໄຟຟ້າແສງຕາເວັນ 3 ເມກາວັດ, ເຊິ່ງກໍ່ນອນຢູ່ໃນແຜນການຂະຫຍາຍການຜະລິດໄຟຟ້າແສງຕາເວັນໃຫ້ໄດ້ທັງໝົດ 100 ເມກາວັດ ຂອງ ບໍລິສັດ ອີດີແອວ-ເຈັນ ໂຊລ່າພາວເວີ້ ຈໍາກັດ. ໃນນັ້ນຮັບໃຊ້ນະຄອນຫຼວງວຽງຈັນ ໃຫ້ໄດ້ປະມານ 25 - 30 ເມກາວັດ, ດ້ວຍການສະໜັບ ສະໜູນຂອງ ກະຊວງພະລັງງານ ແລະ ບໍ່ແຮ່ ແລະ ລັດວິສາຫະກິດໄຟຟ້າລາວ, ບໍລິສັດ ຜະລິດ-ໄຟຟ້າລາວ ມະຫາຊົນ ຈຶ່ງໄດ້ຕັດສິນໃຈລົງທຶນກໍ່ສ້າງໂຄງການຕົວແບບພະລັງງານໄຟຟ້າແສງຕາເວັນຂະໜາດ 10 ເມກາວັດ ຕາມການອະນຸມັດໃຫ້ເຮັດທົດລອງ ຂອງ ກະຊວງພະລັງງານ ແລະ ບໍ່ແຮ່ ໂດຍບໍລິສັດ ຜະລິດ - ໄຟຟ້າລາວ ມະຫາຊົນ ໄດ້ມອບໃຫ້ ບໍລິສັດ ອີດີແອວ-ເຈັນ ໂຊລ່າພາວເວີ້ ຈໍາກັດ ເປັນຜູ້ຈັດຕັ້ງປະຕິບັດ ໂດຍການຮ່ວມຮຸ້ນ ລະຫວ່າງ ບໍລິສັດ ຜະລິດ-ໄຟຟ້າລາວ ມະຫາຊົນ ກັບ ບໍລິສັດ ພັດທະນາພະລັງງານບໍລິສຸດ ຈຳກັດຜູ້ດຽວ, ບໍລິສັດ ຜະລິດ-ໄຟຟ້າລາວ ມະຫາຊົນ ຖືຮຸ້ນ 60 ສວ່ນຮ້ອຍ ແລະ ບໍລິສັດ ພັດທະນາພະລັງງານບໍລິສຸດ ຈຳກັດຜູ້ດຽວ ຖືຮຸ້ນ 40 ສ່ວນຮ້ອຍ.