ຜ-ຟຟລ ໃຫ້ຄວາມຊ່ວຍເຫລືອຜູ້ທີ່ຖືກຜົນກະທົບຈາກການເກີດອຸປະຕິເຫດໂຄງການກໍ່ສ້າງເຂື່ອນໄຟຟ້າ ເຊປຽນ-ເຊນໍ້ານ້ອຍ
ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ພ້ອມດ້ວຍພະນັກງານທຸກລະດັບ ຂໍສະແດງຄວາມເສົ້າສະຫລົດໃຈ ແລະ ເປັນຫວ່ງເປັນໃຍຢ່າງຍິ່ງຕໍ່ປະຊາຊົນ ຄອບຄົວ ແລະ ທຸກພາກສ່ວນທີ່ໄດ້ຮັບຜົນກະທົບຈາກການເກີດອຸປະຕິເຫດໃນຄັ້ງນີ້. ຜ-ຟຟລ ພ້ອມດ້ວຍພະນັກງານທຸກຄົນ ຈຶ່ງຂໍແບ່ງປັນ ແລະ ບັນເທົາຄວາມທຸກຂອງພີ່ນ້ອງຮ່ວມຊາດ ດ້ວຍການບໍລິຈາກເບື້ອງຕົ້ນ ເປັນຈຳນວນເງິນທັງໝົດ 100.000.000 ກີບ ໃນວັນທີ 25 ກໍລະກົດ 2018; ແລະຫວັງຢ່າງຍິ່ງວ່າສະພາບການຕ່າງໆຄົງຈະດີຂຶ້ນ ແລະ ສາມາດຄວບຄຸມໄດ້.
ພ້ອມກັນນີ້ ເພື່ອຮັບປະກັນຄວາມປອດໄພຂອງບັນດາເຂື່ອນໄຟຟ້າທີ່ຂຶ້ນກັບການຄຸ້ມຄອງ ຂອງ ຜ-ຟຟລ ລວມທັງເຂື່ອນໄຟຟ້າທີ່ ຜ-ຟຟລ ເຂົ້າໄປຮ່ວມຮຸ້ນ ແລະເພື່ອຮັບປະກັນການບໍລິຫານນໍ້າໃຫ້ເກີດປະສິດທິຜົນສູງ ມີຄວາມປອດໄພ ຜ-ຟຟລ ໄດ້ແຕ່ງຕັ້ງຄະນະກຳມະການສະເພາະກິດຂຶ້ນເພື່ອຮັບຜິດຊອບສະເພາະ.
ນອກຈາກນີ້ ຜ-ຟຟລ ຂໍຖືເປັນກຽດແຈ້ງມາຍັງທ່ານຊາບວ່າ ໂຄງການກໍ່ສ້າງເຂື່ອນໄຟຟ້າ ເຊປຽນ-ເຊນໍ້ານ້ອຍ ບໍລິສັດ ຜະລິດ-ໄຟຟ້າລາວ ມະຫາຊົນ ບໍ່ໄດ້ລົງທຶນ ແລະ ບໍ່ໄດ້ເຂົ້າຮ່ວມຮຸ້ນຢູ່ໃນໂຄງການດັ່ງກ່າວ.