ລະດັບນໍ້າຂອງເຂື່ອນໄຟຟ້ານໍ້າຄານ 2-3 ຍັງຢູ່ໃນລະດັບທີ່ປອດໄພ.
ຄະນະຮັບຜິດຊອບ ເຂື່ອນ ໄຟຟ້ານ້ຳຄານ 2-3 ໄດ້ມີການອອກແຈ້ງການເຖີງບັນດາພາກສ່ວນຕ່າງໆພາຍໃນເມືອງຫຼວງພະບາງ ແລະ ເມືອງຊຽງເງິນ, ແຂວງຫຼວງພະບາງ ຊາບທົ່ວເຖີງກັນວ່າ ນັບຕັ້ງແຕ່ວັນທີ 20 ກໍລະກົດ 2018 ເປັນຕົ້ນມາ ໄດ້ມີການລະບາຍນ້ຳຜ່ານປະຕູນໍ້າລົ້ນ ຂອງເຂື່ອນ ໄຟຟ້ານ້ຳຄານ 3 ດັ່ງນັ້ນ ຈຶ່ງໄດ້ປະຊາສຳພັນ ເຖິງອໍານາດການປົກຄອງ, ຜູ້ປະກອບການທຸກພາກສ່ວນ ແລະ ພໍ່ແມ່ປະຊາຊົນ ທີ່ອາໃສ່ຢູ່ລ້ອງສາຍນ້ຳຄານຕອນລຸ່ມ ໃຫ້ມີສະຕິກຽມພ້ອມ ໃຫ້ເຝົ້າລະວັງ ແລະ ເກັບມ້ຽນສິ່ງຂອງ ເພື່ອປ້ອງກັນການເສຍຫາຍ ຈາກນ້ຳຖ້ວມເຖິງ ອັນເນື່ອງມາຈາກການລະບາຍນໍ້າຜ່ານປະຕູນ້ຳລົ້ນ ແລະ ນ້ຳຫ້ວຍກ້ອງເຂຶື່ອນ ເຊິ່ງຈະເຮັດໃຫ້ລະດັບນ້ຳທ້າຍເຂື່ອນ ໄຟຟ້ານ້ຳຄານ 3 ແລະ ລ້ອງນໍ້າຄານຕອນລຸ່ມເພີ່ມຂຶ້ນ ເຊິ່ງການລະບາຍນ້ຳຈະມີຄື:
- ລະບາຍຜ່ານປະຕູນ້ຳລົ້ນ ປະລິມານ 600-700 ແມັດກ້ອນ ຕໍ່ວິນາທີ
- ລະບາຍຜ່ານການແລ່ນຈັກ ປະລິມານ 85 ແມັດກ້ອນ ຕໍ່ວິນາທີ
ລວມປະລິມານນ້ຳລົງສູ່ທ້າຍເຂື່ອນ ໄຟຟ້າ ນ້ຳຄານ 3 ທັງໝົດ 685-785 ແມັດກ້ອນ ຕໍ່ວິນາທີ;
ການປ່ຽນແປງດັ່ງກ່າວ ຈະເຮັດໃຫ້ລະດັບນ້ຳທ້າຍເຂື່ອນປ່ຽນແປງ ຈາກລະດັບປົກກະຕິ 306 ແມັດ ທຽບໃສ່ລະດັບໜ້ານ້ຳທະເລ ມາເປັນ 312 ແມັດ ທຽບໃສ່ລະດັບໜ້ານ້ຳທະເລ ເຊິ່ງຈະເຮັດໃຫ້ນ້ຳທ້າຍເຂື່ອນໄຟຟ້າ ນ້ຳຄານ 3 ເພີ່ມຂຶ້ນ ລະຫ່ວາງ 3-6 ແມັດ (ລະດັບນໍ້າດັ່ງກ່າວນີ້ ຍັງບໍ່ຈັດຢູ່ໃນລະດັບອັນຕະລາຍ) ຍັງຢູ່ໃນລະດັບປອດໄພ ແລະ ຄ້າຍຄືກັບ ຍາມລະດູຝົນທີ່ຜ່ານມາ. ທັງນີ້, ການລະບາຍນໍ້າດັ່ງກ່າວກໍ່ເພື່ອເປັນການຮັບປະກັນຜົນກະທົບທາງດ້ານ ສິ່ງແວດລ້ອມ ແລະ ສັງຄົມ ໂດຍສະເພາະບັນດາບ້ານ ທີ່ຢູ່ຕອນລຸ່ມຂອງສາຍນໍ້າຄານ.
ເຖິງຢ່າງໃດກໍ່ຕາມ, ການແຈ້່ງເຕືອນດັ່ງກ່າວແມ່ນໄດ້ ປະຕິບັດ ອີງຕາມການແຈ້ງເຕືອນໄພ ຝົນຕົກ ເລກທີ 0818/ກອຕທ, ນະຄອນຫຼວງວຽງຈັນ ວັນທີ 24 ກໍລະກົດ 2018 ແລະ ອີງຕາມປະລິມານນໍ້າໄຫຼຕົວຈິງ ໃນແຕ່ລະວັນເພີ່ມຂຶ້ນ ຢ່າງຕໍ່ເນື່ອງ ເຮັດໃຫ້ການກັກເກັບນ້ຳພາຍໃນ ອ່າງເກັບນ້ຳຂອງເຂື່ອນ ໄຟຟ້າ ນ້ຳຄານ 3 ເພີ່ມຂຶ້ນ ແລະ ເພື່ອຄວບຄຸມ ລະດັບນ້ຳໜ້າອ່າງ ແລະ ກ້ອງເຂື່ອນ ໄຟຟ້າ ນ້ຳຄານ 2-3 ໃຫ້ຢູ່ໃນລະດັບທີ່ປອດໄພ ຄວບຄຸມໄດ້ ແລະ ເພື່ອປ້ອງກັນໄພນ້ຳຖ້ວມ ຈາກນໍ້າທີ່ເກີດຂຶ້ນຕາມທຳມະຊາດ ຢ່າງຕໍ່ເນື່ອງ.
ເຂື່ອນໄຟຟ້ານ້ຳຄານ 3 ຕັ້ງຢູ່ສາຍນ້ຳຄານ ລະຫ່ວາງ ບ້ານ ບ້ານ ດອນໂມ ແລະ ບ້ານ ຄອນຫວາຍ, ເມືອງ ຊຽງເງີນ, ແຂວງ ຫຼວງພະບາງ, ຫ່າງຈາກຕົວເມືອງຫຼວງພະບາງ ໄປທາງທິດຕາເວັນອອກສ່ຽງໃຕ້ຕາມເສັ້ນທາງ ເລກທີ 13 ເໝືອ ປະມານ 24, ເຂື່ອນໄຟຟ້ານ້ຳຄານ 3 ມີກຳລັງຕິດຕັ້ງ 60 MW ສາມາດຜະລິດພະລັງງານໄຟຟ້າໄດ້ 240.8 GWh ຕໍ່ປີ. ສໍາລັບເຂື່ອນໄຟຟ້ານໍ້າຄານ 2 ຕັ້ງຢູ່ສາຍນ້ຳຄານ ຫ່າງຈາກເຂື່ອນໄຟຟ້າ ນ້ຳຄານ 3 ປະມານ 48 Km ຕັ້ງຢູ່ເມືອງຊຽງເງີນແຂວງຫຼວງພະບາງ ຫ່າງຈາກນະຄອນຫຼວງວຽງຈັນໄປທາງທິດເໜືອປະມານ 400 ກິໂລແມັດ ແລະ ຫ່າງຈາກໃຈກາງເມືອງຫຼວງພະບາງເຂົ້າຫາເຂື່ອນປະມານ 80 ກິໂລແມັດ.