ເຂື່ອນ ໄຟຟ້າ ນ້ຳງື່ມ -1 ເຜີຍແຜ່ ຄວາມເຂົ້າໃຈ ການບໍລິຫານຈັດການນ້ຳໃນລະດູແລ້ງ
ໃນວັນທີ 7 ພະຈິກ ປີ 2019 ທ່ານ ສີລິພົມ ແສງອ່ອນແກ້ວ ອຳນວຍການເຂື່ອນ ໄຟຟ້ານ້ຳງື່ມ -1 ໄດ້ລົງປະຊາສຳພັນ ກ່ຽວກັບ ວຽກງານບໍລິຫານ ຈັດການນ້ຳ ຂອງເຂື່ອນ ໄຟຟ້ານ້ຳງື່ມ ໃນໄລຍະລະດູແລ້ງ ທີ່ສະໂມສອນສຶກສາເມືອງ ໄຊທານີ ນະຄອນຫຼວງວຽງຈັນ.
ຈຸດປະສົງຫຼັກຂອງການເພື່ອເຜີຍແຜ່ ກໍເພື່ອ ໃຫ້ອຳນາດການປົກຄອງ ບັນດາບ້ານ ທີ່ຂຶ້ນກັບເມືອງ ໄຊທານີ ຮັບຮູ້ ກ່ຽວກັບສະພາບການບົກແຫ້ງຫຼາຍຂອງສາຍນ້ຳງື່ມ ເມື່ອສົມທຽບໃສ່ຮອບຫຼາຍປີທີ່ຜ່ານມາ. ເຂົ້າຮ່ວມໃນກອງປະຊຸມ ເຜີຍແຜ່ຄັ້ງນີ້ ມີບັນດາ ການນຳເມືອງ ໄຊທານີ ບັນດານາຍບ້ານ ແລະ ປະຊາຊົນ ພ້ອມດ້ວຍນ້ອງໆນັກຮຽນພາຍໃນເມືອງ ໄຊທານີ. ມາຮອດປະຈຸບັນເຂື່ອນໄຟຟ້ານ້ຳງື່ມ 1 ໄດ້ເດີນເຄື່ອງຈັກພຽງໜ່ວຍດຽວ ມີກຳລັງຕິດຕັ້ງ 17,5 ເມກາວັດ ຈາກທັງໝົດ 7 ເຄື່ອງຈັກ, ລະດັບນ້ຳງື່ມ ໃນວັນທີ 13 ພະຈິກ ປີ 2019 ຢູ່ທີ່ 206,81 ແມັດ ທຽບໃສ່ລະດັບໜ້ານ້ຳທະເລ ປະລິມານນ້ຳໃນອ່າງປະມານ 5300 ລ້ານແມັດກ້ອນ ຫຼື່ ເທົ່າກັບ 74,67 ສ່ວນຮ້ອຍ.