EDL-Gen ຮັບລາງວັນ ‘The ESQR’s Quality Choice Prize 2022’ ທີ່ ປະເທດສະເປນ
ໃນວັນທີ 03 ກໍລະກົດ 2022, ຕາງໜ້າຄະນະນຳຂອງ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຮັບກຽດເຂົ້າຮ່ວມພິທີຮັບລາງວັນ ‘ESQR’s Quality Choice Prize 2022’ ທີ່ ເມືອງ ບາເຊວໂລນາ ປະເທດສະເປນ.
ລາງວັນ ‘ESQR’s Quality Choice Prize 2022’ ແມ່ນລາງວັນທີ່ມອບໃຫ້ກັບບັນດາອົງກອນ, ວິສາຫະກິດ ແລະ ສະຖາບັນຕ່າງໆ ທີ່ມີຜົນງານດີເດັ່ນໃນການບໍລິຫານຈັດການອົງກອນທີ່ດີ, ມີຜົນການດຳເນີນທຸລະກິດທີ່ໂດດເດັ່ນ, ແລະ ມີຄຸນນະພາບໃນປີ 2022, ຊຶ່ງ ຜ-ຟຟລ ກໍ່ແມ່ນໜຶ່ງໃນ 50 ກວ່າອົງກອນທົ່ວໂລກທີ່ໄດ້ຖືກຄັດເລືອກໃຫ້ຮັບລາງວັນດັ່ງກ່າວ.
ສຳລັບພິທີຮັບລາງວັນໃນປີນີ້ ມີຕົວແທນເຂົ້າຮ່ວມຫຼາຍກວ່າ 50 ສະຖາບັນ ທີ່ເປັນບໍລິສັດຊັ້ນນຳໃນທົ່ວໂລກ, ອົງກອນ ແລະ ຂະແໜງທຸລະກິດ ທີ່ມາຈາກບັນດາປະເທດເອີລົບ, ອາຊີ, ອາເມລີກາ, ອາຟຣີກາລວມທັງໝົດ 38 ປະເທດ.
ອົງການ European Society for Quality Research (ESQR) ສ້າງຕັ້ງຂຶ້ນໃນປີ 2012, ມີສໍານັກງານໃຫຍ່ຕັ້ງຢູ່ເມືອງ ໂລຊານ, ປະເທດສະວິດສະແລນ, ໂດຍມີຈຸດປະສົງເປົ້າໝາຍໃນການສົ່ງເສີມຄວາມຮັບຮູ້ທາງດ້ານຄຸນນະພາບຂອງການບໍລິຫານອົງກອນ, ສົ່ງເສີມການດຳເນີນທຸລະກິດທີ່ມີປະສິດທິພາບ, ສົ່ງເສີມຄວາມສາມາດຂອງອົງກອນໃນການຫັນເປັນນະວັດຕະກໍາເຕັກໂນໂລຊີທີ່ທັນສະໄໝ, ພ້ອມນີ້ຍັງເປັນອົງກອນທີ່ເຜີຍແຜ່ ກົນລະຍຸດ ແລະ ຍຸດທະສາດການປະຕິບັດງານຂອງອົງກອນໃຫ້ມີຄຸນນະພາບ ແລະ ໃຫ້ບົດຮຽນອັນດີແກ່ອົງກອນຕ່າງໆໃນທົ່ວໂລກ.
ESQR ມີບົດບາດໃນການເຮັດບົດຄົ້ນຄວ້າ-ວິໄຈ, ໃຫ້ຄຳແນະນຳ, ປືກສາທາງດ້ານທຸລະກິດ, ຈັດຝຶກອົບຮົມ ແລະ ໃຫ້ລາງວັນແກ່ບັນດາອົງກອນໃນທົ່ວໂລກທີ່ມີຜົນງານດີເດັ່ນ.
ລາງວັນ ‘ESQR’s Quality Choice Prize 2022’ ທີ່ ຜ-ຟຟລ ໄດ້ຮັບໃນປີນີ້ ຖືເປັນຄວາມພາກພູມໃຈໃຫ້ແກ່ການນຳ ແລະ ພະນັກງານຂອງ ຜ-ຟຟລ ທີ່ໄດ້ຮັບການຍອມຮັບ ແລະ ເປັນທີ່ຮັບຮູ້ໃນເວທີລະດັບສາກົນ, ເປັນຄວາມເອກອ້າງທະນົງໃຈຂອງ ບໍລິສັດ ທີ່ສາມາດຍາດເອົາລາງວັນດັ່ງກ່າວນີ້ມາເປັນກຽດໃນອົງກອນ ເຊິ່ງມີຄວາມໝາຍ ຄວາມສຳຄັນໃນລະດັບສາກົນ.
ຕະຫຼອດໄລຍະເວລາທີ່ຜ່ານມາ ໃນການດຳເນີນທຸລະກິດ ຂອງ ຜ-ຟຟລ ໄດ້ຮັບຄວາມໜ້າເຊື່ອຖື ແລະ ສະໜັບສະໜູນຈາກລັດຖະບານ ນັກລົງທືນ ແລະ ສະຖາບັນການເງີນທັງພາຍໃນ ແລະ ຕ່າງປະເທດ ໃນຫຼາຍໆດ້ານ ການດຳເນີນທຸລະກິດທີ່ຜ່ານມາ ໄດ້ເຮັດໃຫ້ ຜ-ຟຟລ ໄດ້ຮັບລາງວັນດີເດັ່ນໃນລະດັບສາກົນ ແລະ ພາຍໃນຫຼາຍລາງວັນ.
ຜ-ຟຟລ ຈະສືບຕໍ່ກໍ່ສ້າງຄວາມເຂັ້ມແຂງ ແລະ ເຊື່ອໝັ້ນ ໃນການດຳເນີນທຸລະກິດຕາມວິໃສທັດ, ພາລະກິດ ເພື່ອໃຫ້ອົງກອນມີຄວາມໝັ້ນຄົງ ໂດດເດັ່ນ ແລະ ສ້າງຄວາມໝັ້ນໃຈໃຫ້ແກ່ຜູ້ຖືຮຸ້ນໃນການດຳເນີນທຸລະກິດນັບມື້ນັບດີຂຶ້ນ.