ເພື່ອເປັນການຕອບສະໜອງພະລັງງານໄຟຟ້າຮັບໃຊ້ສັງຄົມໃຫ້ໝັ້ນຄົງ ແລະ ຮັບປະກັນ, ຜ່ານການຄົ້ນຄ້ວາ ແລະ ເຫັນດີສະໜັບສະໜູນຂອງກະຊວງພະລັງງານ ແລະ ບໍ່ແຮ່, ລັດວິສາຫະກິດໄຟຟ້າລາວ ແລະ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ພ້ອມທັງເປັນການປະຕິບັດແຜນຍຸດທະສາດຂອງລັດຖະບານໃນການພັດທະນາພະລັງງານທົດແທນໃຫ້ປາກົດຜົນເປັນຈິງເທື່ອລະກ້າວ, ດັ່ງນັ້ນ ບໍລິສັດ ຜະລິດ-ໄຟຟ້າລາວ ມະຫາຊົນ ຈຶ່ງໄດ້ສ້າງຕັ້ງບໍລິສັດ ອີດີແອວ-ເຈັນ ໂຊລ່າ ພາວເວີ້ ຈຳກັດ ຫຼື EDL-Gen Solar Power ຂຶ້ນໃນວັນທີ 18 ທັນວາ 2015, ຊຶ່ງເປັນບໍລິສັດຮ່ວມທຶນລະຫວ່າງ ບໍລິສັດ ຜະລິດ-ໄຟຟ້າລາວ ມະຫາຊົນ ຖືຮຸ້ນ 60% ແລະ ບໍລິສັດ ພັດທະນາພະລັງງານບໍລິສຸດ ຈຳກັດຜູ້ດຽວ 40%.
ບໍລິສັດ ອີດີແອວ-ເຈັນ ໂຊລ່າ ພາວເວີ້ ຈຳກັດ ມີຄວາມປາຖະໜາຢ່າງແຮງກ້າທີ່ຈະເປັນບໍລິສັດນຳໜ້າອັນດັບໜຶ່ງ ຂອງ ສປປ ລາວ ໃນການດຳເນີນທຸລະກິດທາງດ້ານພະລັງງານທົດແທນ ເພື່ອຮັບປະກັນ ແລະ ຕອບສະໜອງພະລັງງານໄຟຟ້າ ໃຫ້ແກ່ການພັດທະນາເສດຖະກິດ-ສັງຄົມ ຂອງຊາດ ຄຽງຄູ່ກັບການຜະລິດພະລັງງານໄຟຟ້າ ດ້ວຍພະລັງງານນ້ຳ.
ບໍລິສັດ ຈະປະກອບສ່ວນຢ່າງແຂງແຮງ ສ້າງໃຫ້ ສປປ ລາວ ໄດ້ກາຍເປັນໝໍ້ໄຟຂອງອາຊຽນ ແລະ ປະກອບສ່ວນຢ່າງເຕັມກຳລັງເຮັດໃຫ້ຂົງເຂດອາຊຽນ ມີຄວາມໝັ້ນຄົງທາງດ້ານພະລັງງານໄຟຟ້າຢ່າງຍືນຍົງ.
ບໍລິສັດ ອີດີແອວ-ເຈັນ ໂຊລ່າ ພາວເວີ້ ຈຳກັດ ໄດ້ຜະລິດໄຟຟ້າແສງຕາເວັນຢ່າງເປັນທາງການ ເຊິ່ງເປັນແຫ່ງທຳອິດໃນ ສປປ ລາວ. ໂຄງການດັ່ງກ່າວ ຕັ້ງຢູ່ບ້ານແຈ້ງສະຫວ່າງ ເມືອງນາຊາຍທອງ ນະຄອນຫຼວງວຽງຈັນ.
ອີງຕາມບົດບັນທຶກກອງປະຊຸມລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ ອີດີແອວ-ເຈັນ ໂຊລ່າ ພາວເວີ້ ຈຳກັດ, ກອງປະຊຸມໄດ້ເຫັນດີກັນໃນການກໍ່ສ້າງໂຄງການພະລັງງານແສງຕາເວັນ ໂດຍມີກຳລັງການຕິດຕັ້ງທັງໝົດ 100 MW ແລະ ໄດ້ແບ່ງອອກເປັນ 2 ໄລຍະຄື:
ໄລຍະທີ 1 — 32 MW ຢູ່ໃນຂອບເຂດນະຄອນຫຼວງວຽງຈັນ:
ໄລຍະທີ 2 — 68 MW ຈະເລີ່ມກໍ່ສ້າງເມື່ອມີຄວາມພ້ອມທັງດ້ານຈຸດທີ່ດິນ ແລະ ຈຸດເຊື່ອມຕໍ່ລະບົບເຂົ້າກັບ ລັດວິສາຫະກິດໄຟຟ້າລາວ ທີ່ເໝາະສົມ.
