ໃນພິທີເປີດ, ທ່ານ ສຸກສະຫວາດ ໂສສຸພັນ, ຜູ້ອຳນວຍການໃຫຍ່ EDL-Gen, ໄດ້ເນັ້ນຢໍ້າວ່າ: “ວຽກງານກວດສອບແມ່ນໜຶ່ງໃນວຽກງານທີ່ສຳຄັນທີ່ສຸດຕໍ່ການດໍາເນີນທຸລະກິດ, ເຊິ່ງມີບົດບາດສຳຄັນຕໍ່ແຜນປະຕິຮູບຮອບດ້ານຂອງ EDL-Gen. ພວກເຮົາຕ້ອງມຸ່ງເນັ້ນໃຫ້ລະບົບການປະຕິບັດວຽກງານໃນທຸກຂົງເຂດມີຄວາມຖືກຕ້ອງ, ໂປ່ງໃສ, ກວດສອບໄດ້, ແລະ ມີມາດຕະຖານທຽບເທົ່າສາກົນ ຕາມວິໄສທັດ ແລະ ພາລະກິດຂອງບໍລິສັດ.”

ການຝຶກອົບຮົມຄັ້ງນີ້ໃຊ້ເວລາ 2 ວັນ, ໂດຍມີນັກສຳມະນາກອນເຂົ້າຮ່ວມທັງໝົດ 60 ທ່ານ, ເຊິ່ງລ້ວນແລ້ວແຕ່ເປັນຜູ້ທີ່ມີບົດບາດສຳຄັນຕໍ່ການເຄື່ອນໄຫວວຽກງານທົ່ວ EDL-Gen:

• ຄະນະຜູ້ອໍານວຍການຝ່າຍພາຍໃນສໍານັກງານໃຫຍ່

• ພະນັກງານລະດັບພະແນກການ

• ຄະນະຜູ້ອໍານວຍການເຂື່ອນ ທີ່ EDL-Gen ຄຸ້ມຄອງ

ຜົນການຝຶກອົບຮົມໄດ້ສະແດງໃຫ້ເຫັນວ່າ ຫົວຂໍ້ທີ່ນຳມາຄົ້ນຄວ້າ ແລະ ຖອດຖອນບົດຮຽນແມ່ນສອດຄ່ອງກັບຈຸດປະສົງຂອງແຜນປະຕິຮູບ, ໂດຍສະເພາະແມ່ນການຍົກລະດັບວຽກງານກວດສອບ-ກວດກາທົ່ວ EDL-Gen.

ເນື້ອໃນສຳຄັນທີ່ນັກສຳມະນາກອນໄດ້ຮັບໃນຄັ້ງນີ້ປະກອບດ້ວຍ:

1. ລະບົບຄວບຄຸມພາຍໃນ:

o ຄວາມໝາຍ ແລະ ຄວາມສຳຄັນຂອງລະບົບຄວບຄຸມ.

o ນຳໃຊ້ຄູ່ມືກວດສອບ ISSAI (International Standards of Supreme Audit Institutions) ແລະ ຫຼັກການຂອງ COSO (The Committee of Sponsoring Organizations of the Treadway Commission) ເຊິ່ງເປັນມາດຕະຖານສາກົນໃນການອອກແບບ, ດໍາເນີນ ແລະ ປະເມີນລະບົບຄວບຄຸມພາຍໃນ.

2. ການກວດສອບຈັດຊື້-ຈັດຈ້າງ:

o ຂັ້ນຕອນການກະກຽມ, ການດໍາເນີນການ ແລະ ການສະຫຼຸບລາຍງານຜົນການກວດສອບ ຈັດຊື້-ຈັດຈ້າງ ຢ່າງເປັນລະບົບ.

ນອກຈາກນີ້, ຍັງໄດ້ເນັ້ນໃສ່ການແລກປ່ຽນບົດຮຽນເພື່ອໃຫ້ນັກສຳມະນາກອນສາມາດນຳໃຊ້ເຄື່ອງມືດ້ານກົດໝາຍ, ນິຕິກຳ ແລະ ມາດຕະຖານກວດສອບແຫ່ງລັດທີ່ກ່ຽວພັນໂດຍກົງກັບ EDL-Gen.

ໃນພິທີປິດ, ທ່ານ ສຸກສະຫວາດ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງການຝຶກອົບຮົມ ແລະ ໄດ້ມີການມອບໃບຢັ້ງຢືນໃຫ້ກັບນັກສຳມະນາກອນທຸກທ່ານ ເພື່ອຢັ້ງຢືນ ແລະ ພ້ອມນຳເອົາຄວາມຮູ້ໄປຜັນຂະຫຍາຍເຂົ້າໃນວຽກງານຕົວຈິງ.

EDL-Gen ຂໍຢືນຢັນວ່າ: ພວກເຮົາຍັງສືບຕໍ່ເອົາໃຈໃສ່ໃນການພັດທະນາບຸກຄະລາກອນ ແລະ ວຽກງານກວດສອບ-ກວດກາ ເພື່ອສ້າງຄວາມໝັ້ນຄົງ, ໂປ່ງໃສ, ແລະ ຍືນຍົງໃນທຸກການເຄື່ອນໄຫວ.