ລັດວິສາຫະກິດໄຟຟ້າລາວ (ຟຟລ) ແລະ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຮ່ວມກັນຂັດກິດຈະກຳປູກຕົ້ນໄມ້ ແລະ ປ່ອຍປ່າ ເພື່ອເປັນການສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 01 ມິຖຸນາ ປະຈໍາປີ 2023 ທີ່ຂື່ອນໄຟຟ້ານໍ້າເລິກ, ເມືອງ ລ້ອງຊານ, ແຂວງ ໄຊສົມບູນ.

ກິດຈະກຳດັ່ງກ່າວເຂົ້້າໃຫ້ກຽດຮ່ວມໂດຍ ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ຟຟລ ທັງເປັນຮອງປະທານສະພາບໍລິຫານ ຜ-ຟຟລ, ທ່ານ ບຸນກອງ ຊົ່ງປາຢິ້ງ ເຈົ້າເມືອງລ້ອງຊານ, ທ່ານ ວັນແສງ ວັນນະວົງ ຮັກສາການຜູ້ອຳນວຍການໃຫຍ່ ຜ-ຟຟລ ພ້ອມດ້ວຍຄະນະ, ອຳນາການປົກຄອງທ້ອງຖິ່ນ, ພະນັກງານ ຂອງ ຟຟລ ແລະ ຜ-ຟຟລ ພ້ອມດ້ວຍຄູອາຈານ ແລະ ນ້ອງນັກຮຽນຈາກໂຮງຮຽນອະນຸບານ-ປະຖົມ ບ້ານພູປ່າມັນ ແລະ ໂຮງຮຽນປະຖົມ ບ້ານຖໍ້າດິນ ກໍ່ໄດ້ເຂົ້າຮ່ວມຢ່າງພ້ອມພຽງ.

ໃນກິດຈະກຳດັ່ງກ່າວ ໄດ້ມີການປູກຕົ້ນໄມ້ຈໍານວນ 300 ຕົ້ນ ເພື່ອເປັນການສ້າງຄວາມອຸດົມສົມບູນໃຫ້ແກ່ທໍາມະຊາດໃຫ້ມີຄວາມຍືນຍົງສ້າງ ແລະ ໄດ້ປ່ອຍປາ 10.000 ໂຕ ລົງສູ່ອ່າງນໍ້າທໍາມະຊາດ ບໍລິເວນໂຮງຈັກຂອງເຂື່ອນ ເພື່ອສ້າງຄວາມອຸດົມສົມບູນໃຫ້ແກ່ລະບົບນິເວດນໍ້າ.

ນອກຈາກນັ້ນໃນພິທີຄັ້ງນີ້, ຍັງໄດ້ມີການມອບອຸປະກອນການຮຽນ-ການສອນ ແລະ ອຸປະກິລາຈໍານວນໜຶ່ງ ເພື່ອເປັນການສົ່ງເສີມການສຶກສາ ໃຫ້ກັບນ້ອງໆນັກຮຽນຈາກໂຮງຮຽນອະນຸບານ-ປະຖົມ ບ້ານພູປ່າມັນ ແລະ ໂຮງຮຽນປະຖົມ ບ້ານຖໍ້າດິນ.