ຄຽງຄູ່ກັບການຜະລິດພະລັງງານໄຟຟ້າຂອງ ຜ-ຟຟລ, ການພັດທະນາ ພື້ນຖານໂຄງລ່າງຂອງຊຸມຊົນອ້ອມຂ້າງເຂື່ອນ ຖືເປັນສິ່ງທີ່ສຳຄັນ ໃນການພັດທະນາ ໂດຍສະເພາະ ຊີວິດການເປັນຢູ່ຂອງປະຊາຊົນ ທີ່ອາໃສຢູ່ອ້ອມຂ້າງບັນດາເຂື່ອນຂອງ ຜ-ຟຟລ.

ຜ-ຟຟລ ໄດ້ປະກອບສ່ວນສະໜັບສະໜູນທຶນກໍ່ສ້າງເສັ້ນທາງປູຢາງ 02 ຊັ້ນ ແຕ່ຫ້ອງການເຂື່ອນໄຟຟ້ານໍ້າຄານ3 ໄປຫາທ່າເຮືອຂອງເຂື່ອນໄຟຟ້ານໍ້າຄານ3, ເພື່ອເປັນການອຳນວຍຄວາມສະດວກໃນການນໍາໃຊ້ເສັ້ນທາງສັນຈອນໃຫ້ກັບ ປະຊາຊົນ ໂດຍສະເພາະຊາວບ້ານ ບ້ານສາມັກຄີໄຊ ເຊິ່ງ ເປັນບ້ານຈັດສັນ ຂອງໂຄງການເຂື່ອນໄຟຟ້ານໍ້າຄານ3 ໄດ້ນໍາໃຊ້ເພື່ອເດີນທາງເຂົ້າ ຫາແຫຼ່ງທຳມາຫາກິນ ແລະ ຊ່ວຍໃນການສັນຈອນເຂົ້າ-ອອກພາຍໃນເຂື່ອນອີກດ້ວຍ. ໂດຍໂຄງການດັ່ງກ່າວແມ່ນໄດ້ເລີ່ມຕົ້ນກໍ່ສ້າງ ນັບຕັ້ງແຕ່ເດືອນ ທັນວາ 2022  ແລະ ສໍາເລັດຕາມແຜນກໍານົດການກໍ່ສ້າງໃນທ້າຍເດືອນ ມີນາ ປີ 2023 ເຊິ່ງເສັ້ນທາງດັ່ງກ່າວ ມີຄວາມກ້ວາງ 6 ແມັດ ຍາວ 5,45 ກິໂລແມັດ.

ໃນວັນທີີ 21 ເມສາ 2023 ການນໍາຈາກ ບໍລິສັດ ຜະລິດ-ໄຟຟ້າລາວ ມະຫາຊົນ (EDL-Gen) ພ້ອມດ້ວຍ ພາກສ່ວນທີ່ກ່ຽວຂ້ອງ ກໍ່ໄດ້ລົງກວດກາວຽກສຳເລັດ 100% ແລະ ໄດ້ມອບ-ຮັບວຽກຊົ່ວຄາວ ໂຄງການກໍ່ສ້າງເສັ້ນທາງດັ່ງກ່າວ ທີ່ເຂື່ອນໄຟຟ້ານໍ້າຄານ3.

ໂຄງການເຂື່ອນໄຟຟ້ານໍ້າຄານ3 ເປັນໜຶ່ງໃນໂຄງການ ທີ່ຕັ້ງຢູ່ສາຍນໍ້າຄານ ຢູ່ລະຫ່ວາງບ້ານ ດອນໂມ ແລະ ບ້ານ ສາມັກຄີໄຊ, ເມືອງ ຊຽງເງີນ, ແຂວງ ຫຼວງພຣະບາງ, ຫ່າງຈາກຕົວເມືອງ ຫຼວງພຣະບາງ ໄປທາງທິດຕາເວັນອອກສຽງໃຕ້ຕາມ ເສັ້ນທາງເລກທີ 13 ເໜືອ ປະມານ 24 ກິໂລແມັດ