ທ່ານ ດວງສີ ພາຣະຍົກ ອຳນວຍການ ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ຮັບການເລືອກຕັ້ງເປັນ 1 ໃນ 19 ສະຫາຍຂອງ ຄະນະບໍລິຫານງານພັກ ກະຊວງ ພະລັງງານ ແລະ ບໍ່ແຮ່ ສະໄໝທີ III ໃນກອງປະຊຸມໃຫຍ່ ອົງຄະນະພັກ ກະຊວງພະລັງງານ ແລະ ບໍ່ແຮ່ ຄັ້ງທີ III ໄຂຂື້ນລະຫວ່າງວັນທີ 11-12 ພະຈິກ 2021 ທີ່ ຫໍປະຊູມແຫ່ງຊາດ ນະຄອນຫລວງວຽງຈັນ.

ການດຳເນີນກອງປະຊຸມໃນຄັ້ງນີ້ ດຳເນີນໄປພາຍໃຕ້ ມາດຕະການປ້ອງກັນ ແລະ ສະກັດກັ້ນການລະບາດ ຂອງພະຍາດໂຄວິດ-19 ເພື່ອຮັບປະກັນຄວາມປອດໄພຜູ້ທີ່ເຂົ້າຮ່ວມກອງປະຊຸມໃນຄັ້ງນີ້. ກອງປະຊຸມຄັ້ງນີ້ ດໍາເນີນໄປໂດຍການເປັນປະທານຂອງ ສະຫາຍ ປອ ດາວວົງ ພອນແກ້ວ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກະຊວງ ພະລັງງານ ແລະ ບໍ່ແຮ່, ແລະ ໄດ້ຮັບກຽດຢ່າງສູງຕ້ອນຮັບການຮ່ວມ ແລະ ໃຫ້ທິດຊີ້ນໍາ -ໂອ້ລົມຂອງ ສະຫາຍ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍຍົກລັດຖະມົນຕີ, ລັດຖະມົນຕິກະຊວງພະລັງງານ ແຜນການ ແລະ ການລົງທຶນ ພ້ອມດ້ວຍ ບັນດາສະຫາຍຜູ້ແທນສົມບູນ 226 ສະຫາຍ, ຍິງ 47 ສະຫາຍ, ຕາງໜ້າສະມາຊິກພັກ 1036 ສະຫາຍເຂົ້າຮ່ວມ.

ໃນໂອກາດນີ້ ຜູ້ແທນສົມບູນ ທີ່ເຂົ້າຮ່ວມກອງປະຊຸມ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາ ຄະນະ ບໍລິຫານງານພັກ ກະຊວງ ພະລັງງານ ແລະ ບໍ່ແຮ່ ຊຸດທີ III ຈໍານວນ 19 ສະຫາຍ; ກອງປະຊຸມຄັ້ງປະຖົມມະລຶກ ໄດ້ເປັນ ເອກະພາບ ເລືອກຕັ້ງ ສະຫາຍ ປອ ດາວວົງ ພອນແກ້ວ ດໍາລົງຕໍາແໜ່ງ ເລຂາ ຄະນະບໍລິຫານງານພັກ, ສະຫາຍ ທອງພັດ ອິນທະວົງ ດໍາລົງຕໍາແໜ່ງ ຮອງເລຂາ ຄະນະບໍລິຫານງານພັກ, ສະຫາຍ ນາງ ຈັນສະຫວາດ ບຸບຜາ ດໍາລົງຕໍາແໜ່ງ ປະທານກວດກາ

ທ່ານ ດວງສີ ພາລາຍົກ ຮັບຕຳແໜ່ງເປັນອຳນວຍການ ບໍລິສັດ ຜະລິດ-ໄຟຟ້າລາວ ມະຫາຊົນ ແຕ່ເດືອນ ກໍລະກົດ 2020 ເຊິ່ງກ່ອນໜ້ານັ້ນ ແມ່ນເປັນຮອງອຳນວຍການ ລັດວິສາຫະກິດໄຟຟ້າລາວ

ໃນກອງປະຊຸມຄັ້ງນີ້ ບໍລິສັດ ຜະລິດໄຟຟ້າລາວ ມະຫາຊົນ ໄດ້ມອບເງີນເພື່ອສະໜັບສະໜູນ ໃນວຽກງານ ກອງປະຊຸມໃຫຍ່ຂອງອົງຄະນະພັກ ກະຊວງພະລັງງານ ແລະ ບໍ່ແຮ່ ຄັ້ງທີ III ຄັ້ງນີ້ດ້ວຍ.