ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ເຂົ້າຮ່ວມກອງປະຊຸມເປີດກວ້າງ ສະຫຼຸບຕີລາຄາຖອດຖອນບົດຮຽນການຈັດຕັ້ງປະຕິບັດແຜນວຽກພັດທະນາພະລັງງານ ແລະ ບໍ່ແຮ່ 5 ປີ ຄັ້ງທີ VIII (2016-2020) ແລະ ຄາດຄະເນແຜນພະລັງງານ ແລະ ບໍ່ແຮ່ 5 ປີ ຄັ້ງທີ IX (2021-2025)

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ທິດຊີ້ນຳ ແກ່ຂະແໜງການ ພະລັງງານ ແລະ ບໍ່ແຮ່ໃນກອງປະຊຸມເປີດກວ້າງ ສະຫຼຸບຕີລາຄາຖອດຖອນບົດຮຽນການຈັດຕັ້ງປະຕິບັດແຜນວຽກພັດທະນາພະລັງງານ ແລະ ບໍ່ແຮ່ 5 ປີ ຄັ້ງທີ VIII (2016-2020) ແລະ ຄາດຄະເນແຜນພະລັງງານ ແລະ ບໍ່ແຮ່ 5 ປີ ຄັ້ງທີ IX (2021-2025) ເຊິງຈັດຂຶ້ນວັນທີ 4-5 ກຸມພາ 2020 ຢູ່ຫໍປະຊຸມແຫ່ງຊາດ.

ນອກນັ້ນ ເຂົ້າຮ່ວມເປັນປະທານໃນກອງປະຊຸມໃນຄັ້ງນີ້ໂດຍ ທ່ານ ປອ ຄໍາມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍ ບັນດາຮອງລັດຖະມົນຕີ, ມີຜູ້ຕາງໜ້າບັນດາກະຊວງ, ຫ້ອງການ, ອົງການ, ພະແນກການຈາກສູນກາງ ແລະ ທ້ອງຖິ່ນເຂົ້າຮ່ວມ. ກອງປະຊຸມມີຈຸດປະສົງສະຫຼຸບຜົນສຳເລັດໃນການພັດທະນາໃນຂະແໜງການພະລັງງານ ແລະ ບໍ່ແຮ່, ລວມໄປເຖິງຂໍ້ຄົງຄ້າງໃນການດຳເນີນວຽກງານຕ່າງໆທີ່ຜ່ານມາ ແລະ ໄດ້ມີການແລກປ່ຽນຄໍາຄິດຄໍາເເຫັນຂອງພາກສ່ວນທີ່ກ່ຽວຂ້ອງ. ໃນໂອກາດ ກອງປະຊຸມດັ່ງກ່າວ ບໍລິສັດ ຜະລິດ ໄຟຟ້າ-ລາວ ມະຫາຊົນ ໄດ້ວາງສະແດງພາບການເຄື່ອນໄຫວ ແລະ ການເຕີບໃຫຍ່ຂະຫຍາຍຕົວ ຂອງການດຳເນີນທຸລະກິດ ນັບແຕ່ມື້ສ້າງ ຕັ້ງ ບໍລິສັດ ຈົນເຖິງປັດຈຸບັນ ພ້ອມດ້ວຍ ການວາງສະແດງ ຜົນສຳເລັດຂອງການດຳເນີນທຸລະກິດ ຂອງບັນດາ ລັດວິສາຫະກິດ ແລະ ຂະແໜງການຕ່າງໆ ທີ່ຂຶ້ນ ກັບ ພບ.