ຜ-ຟຟລ ມອບອຸປະກອນການຮຽນ ແລະ ເຄື່ອງກິລາໃຫ້ ນ້ອງໆທີ່ ເມືອງຊຽງເງິນ

ວັນທີ 7 ກັນຍາ 2019, ທ່ານ ທອງເພັດ ດ້ວງເງິນ, ຮອງຜູ້ອຳນວຍການໃຫ່ຍ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ພ້ອມດ້ວຍຄະນະອຳນວຍການເຂື່ອນໄຟຟ້ານໍ້າຄານ 2-3 ໄດ້ຮ່ວມໃນພິທີ ມອບອຸປະກອນການຮຽນ ແລະ ເຄື່ອງກິລາໃຫ້ ນ້ອງໆນັກຮຽນໂຮງຮຽນປະຖົມສົມບູນ ບ້ານສາມັກຄີໄຊ, ເມືອງຊຽງເງິນ ແຂວງຫຼວງພະບາງ.

ອຸປະກອນທີ່ໄດ້ນຳມາມອບຄັ້ງນີ້ ແມ່ນການຮ່ວມສົມທົບທຶນລະຫວ່າງ ຜ-ຟຟລ, ບໍລິສັດ SKY Lao ຂາເຂົ້າ-ຂາອອກ ແລະ ການຄ້າ ຈຳກັດຜູ້ດຽວ ເຊິ່ງເປັນບໍລິສັດ ທີ່ນໍາເຂົ້າເຫຼັກເສັ້ນ ແລະ ເຫຼັກຮູບປະພັນສະນິດຕ່າງໆສຳລັບການກໍ່ສ້າງທຸກປະເພດ ທີ່ໄດ້ມາດຕະຖານສາກົນ ພ້ອມດ້ວຍຕາງໜ້າເຄື່ອງກິລາ 26 (Twenty-six Brand) ທີ່ເປັນຍີ່ຫໍ້ຂອງຄົນລາວ ທີ່ປະກອບດ້ວຍເຄື່ອງນຸ່ງຫົ່ມ ແລະ ຊຸດກິລາ ລວມທັງໝົດ 300 ຊຸດ, ອຸປະກອນການຮຽນລວມມີ: ປື້ມ, ບິກ, ສໍ, ໄມ້ບັນທັດ ແລະ ຢາງລືບ ຈໍານວນ 520 ຊຸດ ແລະ ຍັງໄດ້ມອບປື້ມບັນທຶກຂອງ ຜ-ຟຟລ ໃຫ້ກັບ ຄູ-ອາຈານ ເພື່ອນຳໃຊ້ເຂົ້າໃນກິດຈະກຳຕ່າງໆ ຂອງໂຮງຮຽນ. ສຳລັບການມອບໃນຄັ້ງນີ້ ຖືວ່າເປັນໜື່ງໃນກິດຈະກຳຂອງໂຄງການ ‘ຮັກນີ້ແດ່ພີ່ນ້ອງ’ ທີ່ເປັນໂຄງການທີ່ຕັ້ງຂື້ນໂດຍບັນດາພະນັກງານ 3 ອົງການຈັດຕັ້ງຂອງ ຜ-ຟຟລ ທີ່ເຫັນຄວາມສຳຄັນໃນວຽກງານຊ່ວຍເຫຼືອສັງຄົມໂດຍສະເພາະການຊ່ວຍເຫຼືອບັນດານ້ອງໆ ແລະ ພີ່ນ້ອງໃນທົ່ວປະເທດທີ່ມີຄວາມຈຳເປັນ, ຂາດເຂີນ ແລະ ມີຄວາມຕ້ອງການອັນຮີບດ່ວນ.