ເຂື່ອນໄຟຟ້າຫ້ວຍລໍາພັນໃຫຍ່ໄດ້ຮັບຕ້ອນຄະນະວິຊາການກົມທຸລະກິດພະລັງງານ, ກະຊວງພະລັງງານ ແລະ ບໍ່ແຮ່  ລົງຕິດຕາມຄວາມຄືບໜ້າຂອງເຂື່ອນ

ໃນວັນທີ 20 ສິງຫາ 2019 ທີ່ຜ່ານມາ, ຄະນະຜູ້ອໍານວຍເຂື່ອນ,ຫົວໜ້າພະແນກ ແລະ ວິຊາການ  ໄດ້ຮັບຕ້ອນ ທ່ານ ບຸນທຽມ ໄຊສົງຄາມ ຮອງຫົວໜ້າກົມທຸລະກິດພະລັງງານ, ຄະນະພະແນກ,ວິຊາການ ກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່ ແລະ ຫົວໜ້າຫ້ອງການພະລັງງານ ແລະ ບໍ່ແຮ່ ເມືອງ ທ່າແຕງ ແຂວງເຊກອງ ລວມທັງໝົດ 9 ທ່ານ. ຈຸດປະສົງແມ່ນລົງຕິດຕາມຄວາມຄືບໜ້າຂອງເຂື່ອນ, ການບໍລິຫານຈັດການນໍ້າ ແລະ ການປະຕິບັດຕາມພັນທະ CA ລວມເຖິງວຽກງານສິ່ງແວດລ້ອມ ແລະ ສັງຄົມ.

ໃນກອງປະຊຸມທາງເຂື່ອນໄດ້ສະເໜີແຜນການຜະລິດ, ການບໍລິຫານການຈັດການນໍ້າ, ການປ້ອງກັນຮັບມືໄພນໍ້າຖ້ວມ ແລະ ວຽກງານສິ່ງແວດລ້ອມ-ສັງຄົມທີ່ທາງເຂື່ອນໄດ້ປະຕິບັດໃນໄລຍະທີ່ຜ່ານມາ ເປັນຕົ້ນແມ່ນ ການຈັດເກັບສິ່ງເສດເຫຼືອ, ລົງເກັບຕົວຢ່າງນ້ຳ ເພື່ອນຳໄປວິໃຈ ປີໜຶ່ງ 2 ເທື່ອ, ກິດຈະກຳວັນປູກຕົ້ນໄມ້ແຫ່ງຊາດ, ເປີດກອງປະຊຸມເຜີຍແຜ່ຂໍ້ມູນໃຫ້ປະຊາຊົນມີຄວາມເຂົ້າໃຈສະກັດກັ່ນໄຟຈູດປ່າໄມ້ຊະຊາຍ ກ່ຽວກັບຄວາມສຳຄັນຂອງປ່າຍອດນ້ຳ ເພື່ອຫຼຸດຜ່ອນການຖາງປ່າເຮັດໄຮ່, ວຽກງານຕິດຕາມຊີວິດການເປັນຢູ່ ແລະ ຟື້ນຟູຝຶກອາຊີບໃຫ້ປະຊາຊົນບ້ານຈັດສັນ (ບ້ານຫ້ວຍດໍາໃໝ່) ເມືອງທ່າແຕງ, ແຂວງ ເຊກອງ. ຫຼັງຈາກນັ້ນ, ທາງຄະນະເຂື່ອນ ແລະ ຄະນະກົມທຸລະກິດພະລັງງານໄດ້ລົງພາກສະໜາມຕົວຈິງເພື່ອໂອ້ລົມນາຍບ້ານ ແລະ ຕິດຕາມ ສວນສາທິດບ້ານຈັດສັນ (ບ້ານຫ້ວຍດຳໃໝ່) ເມືອງທ່າແຕງ, ແຂວງ ເຊກອງ ທີ່ທາງເຂື່ອນກຳລັງເລີ່ມຈັດຕັ້ງປະຕິບັດ ຮ່ວມ ກັບທີມງານພະແນກກະສິກຳ-ປ່າໄມ້ ແຂວງ ເຊກອງ ເພື່ອຝຶກອາຊີບແກ່ໃຫ້ປະຊາຊົນມີອາຊີບທີ່ໝັ້ນຄົງ.