ພິທີສະຫຼຸບຜົນສຳເລັດການອອກຮຸ້ນກູ້ສະກຸນເງິນບາດຂອງ ຜ-ຟຟລ ໃນປີ 2018-2019

ໃນວັນທີ 7 ມີນາ 2019 ທີ່ໂຮງແຮມ Crowne Plaza, ຜ-ຟຟລ ໄດ້ຈັດພິທີສະຫຼຸບຜົນສຳເລັດການອອກຮຸ້ນກູ້ສະກຸນເງິນບາດມູນຄ່າ 17.500 ລ້ານບາດ ສຳລັບປີ 2018-2019 ທີ່ປະເທດໄທ. ຜົນສຳເລັດດັ່ງກ່າວ ໄດ້ສະແດງໃຫ້ເຫັນເຖິງຄວາມໜ້າເຊື່ອຖືຂອງບໍລິສັດທີ່ເຮັດໃຫ້ນັກລົງທຶນຕ່າງຊາດມີຄວາມເຊື່ອໝັ້ນທີ່ຈະຮ່ວມລົງທຶນກັບການຂະຫຍາຍທຸລະກິດຂອງ ຜ-ຟຟລ, ໂດຍເປັນການອອກຮຸ້ນທີ່ບໍ່ມີລັດຖະບານຄໍ້າປະກັນ ກໍເພື່ອຫຼຸດຜ່ອນພາລະແບກຫາບຂອງທາງພັກ-ລັດ.

ໂດຍໃຫ້ກຽດເປັນປະທານການຖະແຫຼງຂ່າວໂດຍ ທ່ານ ປອ ຄໍາມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່ ແລະທັງເປັນປະທານສະພາບໍລິຫານ ຜ-ຟຟລ,​ ບັນດາການນໍາຂອງພາກສ່ວນທີ່ກ່ຽວຂ້ອງ ແລະ ສື່ມວນຊົນ ກໍໃຫ້ກຽດເປັນສັກຄີພະຍານໃນງານທີ່ມີກຽດຄັ້ງນີ້ດ້ວຍ. ງານນີ້ ຍັງໄດ້ ຍົກໃຫ້ເຫັນຜົນງານ 4 ລາງວັນທີ່ຜ-ຟຟລໄດ້ ຮັບ ຄື: ລາງວັນ The Asset Triple A Country Award ປະຈໍາປີ 2018, ໃນສາຂາ Best Corporate Bond for EDL-Generation’s Bt13.66 billion baht bond, ລາງວັນ FinanceAsia Achievement Awards ປະຈໍາປີ 2018, ໃນສາຂາ Best Laos Deal, EDL-Generation’s 13,7 Billion baht ($410 million) multi-tranche bond, ລາງວັນ ThaiBMA Award ປະຈໍາປີ 2018, ໃນສາຂາ Distinguished Issuer Award ແລະ ລາງວັນ Best Deal & Solution Awards ປະຈໍາປີ 2018, ໃນສາຂາ Best Foreign Currency Sovereign Bond Deal In Southeast Asia 2018.