ຝົນຕົກຢ່າງໜັກຕິດຕໍ່ກັນເປັນເວລາຫຼາຍວັນ ເຮັດໃຫ້ລຳດັບນໍ້າໃນອ່າງນໍ້າງື່ມເພີ່ມຂຶ້ນ

ໃນໄລຍະເດືອນ ກໍລະກົດ 2018 ທີ່ຜ່ານມາ, ປະລິມານນໍ້າທີ່ໄຫຼເຂົ້າອ່າງນໍ້າງື່ມ ໄດ້ມີການເພີ່ມຂື້ນ. ທັງນີ້ກໍ່ຍ້ອນ ສະພາບອາກາດທີ່ມີຝົນຕົກຢ່າງໜັກຕິດຕໍ່ກັນເປັນເວລາຫຼາຍວັນ, ອັນເຮັດໃຫ້ລະດັບນໍ້າໃນອ່າງນໍ້າງື່ມ ເພີ່ມຂຶ້ນຢ່າງຕໍ່ເນື່ອງ ບວກກັບໜັງສືແຈ້ງການຂອງບໍລິສັດ ນ້ຳງື່ມ -2 ຈຳກັດ, ລົງວັນທີ 28 ກໍລະກົດ 2018 ແຈ້ງໃຫ້ຊາບວ່າ ຈະຕ້ອງໄດ້ລະບາຍນ້ຳທີ່ມີຢູ່ໃນອ່າງອອກ ເພຶ່ອຮອງຮັບປະລິມານນ້ຳທີ່ໄຫຼເຂົ້າອ່າງໃນຊ່ວງລະດູຝົນນີ້ ເຊິ່ງມີແຜນຈະລະບາຍນໍ້າອອກ ຈາກອ່າງນໍ້າງື່ມ-2 ມາໃສ່ອ່າງນໍ້າງື່ມ-1 ໃນລະຫ່ວາງວັນທີ 1 ສິງຫາ ຫາ ວັນທີ 30 ກັນຍາ 2018 ເຊິ່ງປະລິມານນໍ້າທີ່ຈະລະບາຍ 50-150 ລ້ານແມັດກ້ອນ ຈະເຮັດໃຫ້ລະດັບນໍ້າທ້າຍເຂື່ອນ ຂອງໂຄງການເຂື່ອນໄຟຟ້ານ້ຳງື່ມ -2 ແລະ ຕາມລຳນໍ້າງື່ມ ລວມທັງໜ້າເຂື່ອນຂອງໂຄງການເຂື່ອນໄຟຟ້າ ນ້ຳງື່ມ-1 ສູງຂຶ້ນເທື່ອລະໜ້ອຍໂດຍເລີ່ມຈາກວັນທີ 1 ສິງຫາ 2018 ເປັນຕົ້ນໄປ.

ດັ່ງນັ້ນລະດັບນ້ຳໜ້າອ່າງນໍ້າງື່ມ-1 ທີ່ວັດແທກໄດ້ໃນມື້ນີ້ ແມ່ນ 208,97 ແມັດ ທຽບໃສ່ລະດັບໜ້ານໍ້າທະເລ (MASL), ສະເລ່ຍ 8 ຊົ່ວແມ່ນເພີ່ມຂື້ນ 1 ຊັງຕີແມັດ ແລະ ນໍ້າໄຫຼເຂົ້າອ່າງ 819.17 ແມັດກ້ອນຕໍ່ວິນາທີ (m3/s).

ແລະ ເພື່ອເປັນການຫຼຸດຜ່ອນຄວາມສ່ຽງ ແລະ ຜົນກະທົບ ທີ່ອາດຈະເກີດຂຶ້ນ ຕໍ່ປະຊາຊົນ ທີ່ອາໃສ່ຢູ່ ຕອນລຸ່ມຂອງ ເຂື່ອນໄຟຟ້ານ້ຳງື່ມ-1 ໃນກໍລະນີ ໄຂປະຕູນ້ຳລົ້ນ ຂອງເຂື່ອນ. ດັ່ງນັ້ນໃນລະຫ່ວາງ ວັນທີ 30 ກໍລະກົດ ຫາ 3 ສິງຫາ 2018 ໜ່ວຍງານສິ່ງແວດລ້ອມ ແລະ ສັງຄົມຂອງເຂື່ອນ ເຂື່ອນໄຟຟ້ານ້ຳງື່ມ -1 ແລະ ເຂື່ອນໄຟຟ້າ ນ້ຳມັງ 3 ໄດ້ລົງ ສຳຫຼວດ ພົບປະພໍ່ແມ່ ປະຊາຊົນ ຈຳນວນ 15 ບ້ານ ເພື່ອເກັບກໍາຂໍ້ມູນຂອງບ້ານ ກໍ່ຄືບັນດາບ້ານທີ່ອາດມີຄວາມສ່ຽງຕໍ່ການເກີດນໍ້າຖ້ວມ ໃນແຂວງວຽງຈັນ ທີ່ຢູ່ລຽບຕາມສາຍນໍ້າງື່ມ ທັງນີ້ ກໍ່ເພື່ອບໍ່ໃຫ້ພໍ່ແມ່ປະຊາຊົນເກີດຄວາມແຕກຕື່ນ ແລະ ຮັບຮູ້ຂໍ້ມູນຂ່າວສານທີ່ເປັນຄວາມຈີງໃນລັກສະນະວິທະຍາສາດ ພ້ອມນີ້ກໍ່ເພື່ອໃຫ້ພໍ່ແມ່ປະຊາຊົນມີສະຕິ ລະມັດລະວັງ ຂຶ້ນຕື່ມ, ຖ້າມີການແຈ້ງການລະບາຍນໍ້າ ກໍ່ຈະສາມາດອົບພະຍົກສັດລ້ຽງ ແລະ ເຄື່ອນຍ້າຍຊັບສິນໃຫ້ທັນເວລານັ້ນເອງ.