ເຂື່ອນໄຟຟ້ານໍ້າງື່ມ-1 ແລະ ເຂື່ອນໄຟຟ້ານໍ້າງື່ມ-2 ຈັດກອງປະຊຸມປຶກສາຫາລື ການບໍລິຫານຈັດການນໍ້າໃນອ່າງນໍ້າງື່ມ

ວັນທີ 1 ສິງຫາ 2018, ເຂື່ອນໄຟຟ້ານໍ້າງື່ມ-1 ເຊິ່ງແມ່ນໜຶ່ງໃນບັນດາເຂື່ອນທີ່ຂຶ້ນກັບ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ເປັນເຈົ້າພາບຈັດກອງປະຊຸມປຶກສາຫາລື ການບໍລິຫານຈັດການນໍ້າໃນອ່າງນໍ້າງື່ມ ລະຫວ່າງ

ເຂື່ອນໄຟຟ້ານໍ້າງື່ມ-1 ແລະ ເຂື່ອນໄຟຟ້ານໍ້າງື່ມ-2 ໃນຊ່ວງລະດູຝົນ ປະຈໍາປີ 2018 ແລະ ຂຶ້ນແຜນ ປີ 2019, ທີ່ຫ້ອງປະຊຸມຂອງເຂື່ອນໄຟຟ້ານໍ້າງື່ມ-1, ເມືອງແກ້ວອຸດົມ ແຂວງວຽງຈັນ ໂດຍການເປັນປະທານ ຂອງ ທ່ານ ເພັດສະຫວັນ ຣັດຕະນະທົງໄຊ, ຮອງຫົວໜ້າຫ້ອງການ ກະຊວງພະລັງງານ ແລະ ບໍ່ແຮ່. ຈຸດປະສົງເພື່ອເປັນການທົບທວນຄືນ ແລະ ນຳສະເໜີວຽກງານການບໍລິຫານຈັດການນໍ້າ ຂອງທັງສອງເຂື່ອນ ໃນ 7 ເດືອນຕົ້ນປີ ແລະ ແຜນການປະຕິບັດ 5 ເດືອນທ້າຍປີ 2018. ເຂົ້າຮ່ວມກອງປະຊຸມນອກຈາກຈະມີຄະນະອຳນວຍການ ແລະ ວິຊາການຈາກທັງສອງເຂື່ອນແລ້ວ ຍັງມີບັນດາທ່ານ ຕາງໜ້າຈາກ ກົມຕ່າງໆ ຂອງກະຊວງພະລັງງານ ແລະ ບໍ່ແຮ່, ຈາກສຳນັກງານໃຫຍ່ ບໍລິສັດ ຜະລິດ-ໄຟຟ້າລາວ ມະຫາຊົນ ນຳໂດຍ ທ່ານ ພູມີ ເນຕິບັນດິດ, ຮອງຜູ້ອຳນວຍການໃຫຍ່ ສາຍງານການຜະລິດ ພ້ອມດ້ວຍຕົວແທນຈາກພາກສ່ວນທີ່ກ່ຽວຂ້ອງເຂົ້າາຮ່ວມຢ່າງພ້ອມພຽງ.