ງານເປີດໂຕເວັບໄຊ໌ ໃຫມ່ຂອງ ຜ-ຟຟລ

ໃນວັນທີ 23 ກຸມພາ 2018, ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຈັດງານເປີດໂຕເວັບໄຊທ໌ ທີ່ມີຮູບແບບໃໝ່, ທີ່ ເດີນກິລາໃນຮົ່ມ ລ້ານຊ້າງ ເຊັນເຕີ້. ເຂົ້າຮ່ວມງານໃນຄັ້ງນີ້ມີທ່ານ ຮອງລັດຖະມົນຕີກະຊວງການເງິນ, ທ່ານຮອງລັດຖະມົນຕີກະຊວງພະລັງງານ ແລະ ບໍ່ແຮ່, ຄະນະສະພາ ສະພາບໍລິຫານ ຜ-ຟຟລ ພ້ອມດ້ວຍບັນດາທ່ານຄະນະສະພາບໍລິຫານ,ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ຄະນະຜູ້ອຳນວຍການໃຫຍ່ ຜ-ຟຟລ, ຫົວຫນ້າກົມ, ຮອງກົມ, ຕາງຫນ້າຈາກພາກລັດ ແລະ ເອກະຊົນ ຈຳນວນໜື່ງ ລວມທັງບັນດາຄູ່ຮ່ວມທຸລະກິດ, ບັນດານັກຂ່າວສື່ມວນຊົນ ພ້ອມທັງພະນັກງານຂອງ ຜ-ຟຟລ ໄດ້ເຂົ້າຮ່ວມຈຳນວນປະມານ 150 ທ່ານ. ໃນການປັບປຸງເວັບໄຊທ໌ຄັ້ງນີ້ ແມ່ນໄດ້ມີການປັບປຸງໜ້າຂອງເວັບໄຊທ໌ໃໝ່ ເພື່ອໃຫ້ມີຄວາມທັນສະໄໝ ແລະ ໃຫ້ທັນກັບຍຸກເຕັກໂນໂລຢີໃໝ່ທີ່ຈະກ້າວເຂົ້າມາໃນອານາຄົດອັນໃກ້, ທັງນັ້ນກໍ່ເພື່ອເປັນການເກັບກໍາຂໍ້ມູນພາຍໃນອົງກອນຢ່າງຄົບຖ້ວນ ແລະ ສະດວກສະບາຍໃນການຄົ້ນຫາຂໍ້ມູນຂອງບໍລິສັດ ລວມທັງຜົນການດຳເນີນທຸລະກິດ ຂອງບໍລິສັດ ເປັນແຕ່ລະໄລຍະ ແລະ ເພື່ອເຂົ້າກັບສະພາບຂອງການພັດທະນາເສດຖະກິດໃນປັດຈຸບັນ. ສໍາລັບລາຍລະອຽດສາມາດຕິດຕາມຂໍ້ມູນສໍາຄັນຕ່າງໆໄດ້ທີ່ www.edlgen.com.la ຮູບແບບໃໝ່ຂອງເວັບໄຊທ໌ ແມ່ນປະກອບດ້ວຍລາຍລະອຽດຂອງການດໍາເນີນງານຂອງບໍລິສັດນັບຕັ້ງແຕ່ມື້ເລີ່ມກໍ່ຕັ້ງ ຈົນເຖິງປັດຈຸບັນລວມໄປເຖີງ ບັນດາແຜນງານໃນອະນາຄົດທີ່ຈະໄດ້ມີການພັດທະນາອີກດ້ວຍ.