ມອບລາງວັນ ການແຂ່ງຂັນແຕ້ມຮູບ ພາຍໃຕ້ຫົວຂໍ້ “ພະລັງງານທີ່ຍືນຍົງສຳລັບຊາດ”

ສະຖາບັນວິຈິດສິນແຫ່ງຊາດ ຮ່ວມກັບ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ), ໄດ້ຈັດ ພິທີມອບລາງວັນ ການແຂ່ງຂັນແຕ້ມຮູບ ໃນຫົວຂໍ້ “ພະລັງງານທີ່ຍືນຍົງສຳລັບຊາດ” ໃນວັນທີ 20 ມິຖຸນາ 2017, ທີ່ສະຖາບັນ ວິຈິດສິນ ແຫ່ງຊາດ, ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ. ໃຫ້ກຽດເຂົ້າຮ່ວມພິທີດັ່ງກ່າວ ມີທ່ານ ປອ ໄມສິງ ຈັນບຸດດີ, ຫົວໜ້າສະຖາບັນວິຈິດສິນແຫ່ງຊາດ, ທ່ານ ທອງເພັດ ດ້ວງເງິນ, ຮອງຜູ້ອຳນວຍການໃຫຍ່ ສາຍງານ ພັດທະນາທຸລະກິດ ຂອງ ຜ-ຟຟລ, ທ່ານ ນາງ ສຸກສັນ ພົງພິລາ, ຜູ້ຊ່ວຍ ຜູ້ອຳນວຍການໃຫຍ່ ຜ-ຟຟລ ພ້ອມດ້ວຍແຂກຖືກເຊີນ.

ສຳລັບການແຂ່ງຂັນໃນຄັ້ງນີ້ແມ່ນເລີ່ມມາແຕ່ວັນທີ 21 ເມສາ ຈົນເຖິງ ທີ 20 ມີຖຸນາ 2017, ຊຶ່ງການແຂ່ງຂັນແມ່ນໄດ້ມີການຄັດເລືອກ 3 ຮອບ, ຮອບທຳອິດຄັດຈາກ 40 ກວ່ານ້ອງທີ່ສົ່ງຜົນງານເຂົ້າແຂ່ງຂັນ ໃຫ້ໄດ້ 12 ນ້ອງ ຜ່ານເຂົ້າຮອບທີ 2. ຫຼັງຈາກນັ້ນທັງ 12 ນ້ອງແມ່ນໄດ້ເດີນທາງໄປ ບັນດາເຂື່ອນ ຂອງ ຜ-ຟຟລ ແຕ່ເໜືອຕະຫຼອດໃຕ້ ໃຊ້ເວລາ 3-4 ມື້ ເພື່ອແຕ້ມຮູບ ແລະ ສ້າງສັນຜົນງານໃນສະຖານທີ່ຕົວຈິງ ຄຽງຄູ່ກັບ ການທັດສະນະສຶກສາ, ຮຽນຮູ້ວຽກງານຜະລິດ-ພະລັງງານໄຟຟ້າ ຂອງ ບໍລິສັດ ຜະລິດ ໄຟຟ້າລາວ ມະຫາຊົນ. ຜົນຂອງການແຂ່ງຂັນ ຊະນະເລີດ ອັນດັບໜຶ່ງ ໄດ້ແກ່, ທ້າວ ກິຄຳ ແກ້ວວົງກົດ, ນັກສຶກສາຂະແໜງວິຈິດຕະກຳ ປີ 2, ຊຶ່ງໄດ້ຮັບທຶນການສຶກສາ ມູນຄ່າ 5,000,000 ກີບ, ການແຂ່ງຂັນໃນຄັ້ງນີ້ ລວມມູນຄ່າທຶນການສຶກສາຫຼາຍກ່ວາ 35 ລ້ານກີບ.

ກິດຈະກໍາໃນຄັ້ງນີ້ ຖືວ່າເປັນຄັ້ງທຳອິດຂອງການແຂ່ງຂັນແຕ້ມຮູບຂອງສະຖາບັນວິຈິດສິນແຫ່ງຊາດ ຮ່ວມກັບ ບໍລິສັດ ຜະລິດໄຟຟ້າລາວ ມະຫາຊົນ ຈັດຂື້ນກໍ່ເພື່ອເປັນການເປີດໂອກາດໃຫ້ກັບນັກຮຽນ ນັກສຶກສາໄດ້ເຫັນເຖິງຄວາມສໍາຄັນຂອງການຜະລິດ-ພະລັງງານໄຟຟ້າ ຄຽງຄູ່ກັບການຮັກສາສິ່ງແວດລ້ອມ, ທຳມະຊາດ ແລະ ພັດທະນາສັງຄົມ ເພື່ອໃຫ້ມີ ພະລັງງງານທີ່ຢືນຍົງສຳລັບຊາດຕະຫຼອດໄປ, ພ້ອມນີ້ຍັງເປັນການສະໜັບສະໜູນ ແລະ ຊຸກຍູ້ໃຫ້ນັກສຶກສາ ສະຖາບັນວິຈິດສິນແຫ່ງຊາດ ໄດ້ສະແດງຄວາມຮູ້, ຄວາມສາມາດ ສ້າງສັນຜົນງານ ຜ່ານຮູບແຕ້ມ ໃຫ້ອອກສູ່ສາຍຕາຂອງສັງຄົມ ໄດ້ເຂົ້າໃຈກ່ຽວກັບວຽກງານການຜະລິດ-ພະລັງງານໄຟຟ້າເພີ່ມຂຶ້ນຕື່ມ. ສະເພາະຮູບແຕ່ລະຮູບທີ່ສົ່ງເຂົ້າມາປະກວດ ທາງບໍລິສັດຈະນຳໄປປະດັບຢູ່ບັນດາເຂື່ອນຂອງ ຜ-ຟຟລ ແລະ ຈະນຳສະເໜີຜ່ານສື່ຕ່າງໆ ທັງພາຍໃນ ແລະ ພາຍນອກ.