ພະນັກງານ ຜ–ຟຟລ ເຂົ້າຮ່ວມການຝຶກອົບຮົມໃນຫົວຂໍ້ Basic Hydro Power Plant

ບໍລິສັດ ຜະລິດ-ໄຟຟ້າລາວ ມະຫາຊົນ ຈັດຝຶກອົບຮົມໃນຫົວຂໍ້ “Basic Hydro Power Plant” ໃຫ້ກັບພະນັກງານ ຄຸ້ມຄອງ ແລະ ບໍາລຸງຮັກສາ ເຂື່ອນໄຟຟ້າພະລັງນໍ້າ ຂອງ ຜ-ຟຟລ ຈຳນວນ 30 ທ່ານ, ທີ່ເຂື່ອນໄຟຟ້ານໍ້າງື່ມ1 ໃນລະຫວ່າງວັນທີ 24-28 ເມສາ 2017, ໂດຍ ທ່ານ ນ. ລັດຕະນາ ປະທຸມວັນ ຜູ້ອຳນວຍການໃຫຍ່ ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ເປັນປະທານໃນການເປີດພິທີດັ່ງກ່າວ.

ບໍລິສັດ ຜະລິດ-ໄຟຟ້າລາວ ມະຫາຊົນ ມີຄວາມມຸ້ງໝັ້ນໃນການພັດທະນາຄວາມຮູ້ ແລະ ຄວາມສາມາດ ຂອງບຸກຄະລາກອນ ແລະ ສ້າງຄວາມພ້ອມທາງດ້ານບຸກຄະລາກອນ ເພື່ອພັດທະນາ ແລະ ຂະຫຍາຍທຸລະກິດໃນອານາຄົດ ໃຫ້ເປັນໄປຕາມພາລະກິດຂອງ ຜ-ຟຟລ ທີ່ວາງໄວ້ໃນເບື້ອງຕົ້ນ,

ການຈັດການຝຶກອົບຮົມໃນຄັ້ງນີ້ເພື່ອເປັນການດຳເນີນຕາມແຜນງານ ປະຈຳປີ 2017 ຂອງໂຄງການຮ່ວມມືດ້ານເຕັກນິກ-ວິຊາການເຂື່ອນໄຟຟ້າພະລັງງານນໍ້າ ລະຫວ່າງ ລັດວິສາຫະກິດໄຟຟ້າລາວ ກັບ ການໄຟຟ້າຝ່າຍຜະລິດ ແຫ່ງປະເທດໄທ ແລະ ໄດ້ຮັບກຽດຈາກບັນດາທ່ານ ນັກວິທະຍາກອນ ຜູ້ມີປະສົບການ ຈາກການໄຟຟ້າຝ່າຍຜະລິດແຫ່ງປະເທດໄທ ມານຳສະເໜີບັນດາ ບົດບັນຍາຍທີ່ກ່ຽວຂ້ອງ ລວມທັງແລກປ່ຽນປະສົບການ ໃຫ້ນັກສຳມະນາກອນໄດ້ເຂົ້າໃຈ ແລະ ຈະພັດທະນາກຸ່ມຄົນເຫຼົ່ານີ້ໃຫ້ດີຂຶ້ນ ຮັບໃຊ້ວຽກງານຂອງອົງກອນທີ່ນັບມື້ກ້ວາງຂວາງ ດ້ວຍຄຸນນະພາບທີ່ດີ.