“ຜ-ຟຟລ ຮັບລາງວັນ The Asset Triple A Awards 2016”

ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຮັບລາງວັນ The Asset Triple A Awards ປະຈໍາປີ 2016 ຫຼື The Asset Asian Awards 2016, ໃນສາຂາ Best Deal – Southeast Asia “Best Bond” ຫຼື ການລະດົມທຶນດ້ວຍການຂາຍ ພັນທະບັດດີເດັ່ນ, ເຊິ່ງມີພິທີມອບຮັບ​ຈັດຂຶ້ນໃນວັນທີ 11/01/2017 ທີ່ຮົງກົງ ຈັດໂດຍ The Asset ເຊິ່ງເປັນວາລະສານດ້ານຕະຫຼາດທຶນທີ່ນໍາໜ້າ ແລະ ມີຊື່ສຽງໃນອາຊີ. ລາງວັນດັ່ງກ່າວເປັນລາງວັນລະດັບພາກພື້ນອາຊີ ທີ່ໄດ້ມອບໃຫ້ ຜ-ຟຟລ ເພື່ອຮັບຮູ້ເຖິງຜົນສໍາເລັດອັນພົ້ນເດັ່ນຂອງການລະດົມທຶນຜ່ານການອອກຮຸ້ນກູ້ຂອງ ຜ-ຟຟລ ໃນຕະຫຼາດພັນທະບັດ ຫຼື ຮຸ້ນກູ້ຂອງປະເທດໄທ ໃນເດືອນ ກັນຍາ ປີ 2016 ເຊິ່ງການລະດົມທຶນດັ່ງກ່າວ ແມ່ນຍຸດທະສາດການເຂົ້າເຖິງແຫຼ່ງທຶນຂອງບໍລິສັດ ເຊິ່ງສະແດງອອກຜ່ານການນໍາໃຊ້ຜົນການຈັດລໍາດັບຄວາມໜ້າເຊື່ອຖືຂອງບໍລິສັດ ຫຼື credit rating ເພື່ອເຂົ້າເຖິງແຫຼ່ງທຶນໃນຕະຫຼາດທຶນຂອງອາຊຽນ ໂດຍບໍ່ມີການຄໍ້າປະກັນຈາກລັດຖະບານ ແລະ ໃນຄັ້ງນີ້ສາມາດລະດົມທຶນໄດ້ທັງໝົດ 312 ລ້ານໂດລາ, ດ້ວຍເຫດຜົນນີ້ຈຶ່ງເຮັດໃຫ້  ຜ-ຟຟລ ໄດ້ຮັບລາງວັນທີ່ສຳຄັນໃນຄັ້ງນີ້.

ສຳລັບລາງວັນ The Asset Triple A Awards ຈັດຂື້ນທຸກໆປີ ປີນີ້ເປັນປີທີ 18 ແລ້ວ ເຊິ່ງລາງວັນດັ່ງກ່າວນີ້ແມ່ນໄດ້ມອບໃຫ້ກັບພາກສ່ວນທີ່ມີຜົນງານດີເດັ່ນ ແລະ ໜ້າເຊື່ອຖືໃນການດຳເນີນທຸລະກິດໃນຂະແໜງການຕ່າງໆ ບໍ່ວ່າຈະເປັນຂະແໜງ ການທະນາຄານ, ການບໍລິຫານດ້ານການເງິນ ແລະ ຕະຫຼາດທຶນ ເຊິ່ງໃນຖານະທີ່ເປັນສື່ພີມທາງດ້ານການເງິນ ໃນອາຊີ ທີ່ເຂົ້າເຖິງບັນດານັກລົງທຶນ, ກຸ່ມຜູ້ດຳເນີນທຸລະກິດໃນຂົງເຂດພາກພື້ນອາຊີ ແລະ ບັນດານັກລົງທຶນໃນທົ່ວໂລກ ດັ່ງນັ້ນຈຶ່ງເລັງເຫັນຄວາມສຳຄັນຂອງທຸກພາກສ່ວນ ທີ່ຄວນໄດ້ຮັບການຍ້ອງຍໍ ແລະ ຊົມເຊີຍຜົນສໍາເລັດຂອງບັນດາຂະແໜງການຕ່າງໆທີ່ພົ້ນເດັ່ນໃນທຸກໆປີ. ສາມາດອ່ານລາຍລະອຽດໄດ້ທີ່: http://www.theasset.com/awards/country-awards-2016-deals-south-east-asia