ຜ-ຟຟລ ໃຫ້ການສະໜັບສະໜູນທຶນເຂົ້າໃນໂຄງການເພື່ອສັງຄົມ ແລະ ສິ່ງແວດລ້ອມ

ໃນ ວັນທີ 29 ກັນຍາ 2016 ທີ່ຜ່ານມາ, ຜ-ຟຟລ ໄດ້ສົມທົບທຶນ ຈຳນວນ 165,000,000 ກີບ ເຂົ້າໃນໂຄງການໂຄສະນາ, ປຸກລະດົມຂະບວນການຮັກສາປ່າໄມ້-ແຫຼ່ງນໍ້າ ເພື່ອສົ່ງເສີມການນຳໃຊ້ພະລັງງານຈາກເຂື່ອນໄຟຟ້ານໍ້າຕົກແບບຍືນຍົງ (ຊື່ຫຍໍ້ “ໂຄງການ ເພື່ອສິ່ງແວດລ້ອມ ແລະ ສັງຄົມ”) ເຊິ່ງໂຄງການດັ່ງກ່າວນີ້ ເປັນການຮ່ວມມືກັນລະຫວ່າງ ກະຊວງພະລັງງານ ແລະ ບໍ່ແຮ່, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ທີມງານ ນັກວິຊາການດ້ານປ່າໄມ້-ແຫຼ່ງນໍ້າ ຈາກ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ. ໂຄງການດັ່ງກ່າວນີ້ ແມ່ນຈະໄດ້ຈັດກິດຈະກຳລົງເຄື່ອນໄຫວໂຄສະນາຕາມບ້ານເປົ້າໝາຍໃນເຂດຄຸ້ມຄອງອ່າງນໍ້າງື່ມ, ຜະລິດສື່ສິ່ງພິມໂຄສະນາຕ່າງໆ ແລະ ຍັງມີການຜະລິດລາຍການໂຄສະນາທາງວິທະຍຸກະຈາຍສຽງ ແລະ ໂທລະໂຄ່ງ ເພື່ອເຮັດໃຫ້ປະຊາຊົນມີຄວາມຮູ້ຄວາມເຂົ້າໃຈກ່ຽວກັບການພັດທະນາເຂື່ອນໄຟຟ້ານໍ້າຕົກ ແລະ ການປົກປັກຮັກສາປ່າຕົ້ນນໍ້າ, ຊຶ່ງໂຄງການມີໄລຍະດຳເນີນການ 5ປີ (2016-2020). ນອກນັ້ນ ໂຄງການນີ້ຍັງໄດ້ຮັບທຶນສົມທົບຈາກລັດຖະບານ ແລະ ທະນາຄານໂລກ ພ້ອມທັງການສົມທົບທຶນຈາກ ຫຼາຍພາກສ່ວນຄື ໄຟຟ້ານໍ້າງື່ມ 5, ໄຟຟ້ານໍ້າງື່ມ 2.