ຜ-ຟຟລ ຈັດພິທີ ປູກຕົ້ນໄມ້ ແລະ ປ່ອຍປາ ປະຈໍາປີ 2016

ໃນວັນທີ 04 ມິຖຸນາ 2016, ຜ-ຟຟລ ໄດ້ຈັດກິດຈະກຳປູກຕົ້ນໄມ້ ແລະ ປ່ອຍປາ ເນື່ອງໃນງານວັນປູກຕົ້ນໄມ້ແຫ່ງຊາດ, ເຊິ່ງໄດ້ຈັດຂຶ້ນທີ່ເຂື່ອນໄຟຟ້ານໍ້ຳຊອງ, ເມືອງ ຫີນເຫີບ, ແຂວງ ວຽງຈັນ. ໃຫ້ກຽດເຂົ້າຮ່ວມງານໂດຍ ທ່ານ ປອ. ຄຳມະນີ ອິນທິລາດ ລັດຖະມົນຕີວ່າການ ກະຊວງພະລັງງານ ແລະ ບໍ່ແຮ່ ພ້ອມທັງເປັນ ປະທານສະພາບໍລິຫານ ຜ-ຟຟລ, ທ່ານ ຄຳພູທອນ ເທບສຸພົມ ຫົວໜ້າຫ້ອງວ່າການແຂວງວຽງຈັນ; ພ້ອມດ້ວຍ ຄະນະຜູ້ອໍານວຍການຂອງບໍລິສັດ, ຄະນະກົມຂອງກະຊວງພະລັງງານ ແລະ ບໍ່ແຮ່, ພະນັກງານ ຜ-ຟຟລ, ຕາງໜ້າອຳນາດການປົກຄອງ ແລະ ປະຊາຊົນທ້ອງຖິ່ນ ເຂົ້າຮ່ວມ.

ໃນໂອກາດນີ້ ຜ-ຟຟລ ໄດ້ຈັດສັນເບ້ຍໄມ້ ຈຳນວນ 2,000 ເບ້ຍ ປູກໃນພື້ນທີ່ 4 ເຮັກຕາ ເພື່ອເປັນການສົ່ງເສີມການປູກປ່າ ແລະ ປົກປັກຮັກສາສິ່ງແວດລ້ອມ ພ້ອມທັງການອະນຸລັກຮັກສາຊີວະນາໆພັນ ໂດຍການ ປ່ອຍປາພັນພື້ນເມືອງ ເປັນຈຳນວນ 20,000 ໂຕ ລົງສູ່ບໍລິເວນໂຮງຈັກຂອງເຂື່ອນນໍ້າຊອງ ເຊິ່ງໄຫຼລົງສູ່ ອ່າງນໍ້າງື່ມ ແລະ ແມ່ນໍ້າສາຂາອື່ນໆຕໍ່ໄປ ເພື່ອເປັນການເພີ່ມຄວາມອຸດົມສົມບູນຂອງລະບົບນິເວດໃຫ້ມີຄວາມຍືນຍົງ.

ເນື່ອງໂອກາດດັ່ງກ່າວ ຜ-ຟຟລ ຍັງໄດ້ ມອບອຸປະກອນ ການສຶກສາ ແລະ ກິລາ ລວມເປັນມູນຄ່າກວ່າ 30 ລ້ານກີບ ມອບໃຫ້ແກ່ໂຮງຮຽນປະຖົມສົມບູນ 4 ແຫ່ງ ໃນເມືອງຫີນເຫີບ ແຂວງວຽງຈັນ ເພື່ອນຳໃຊ້ເຂົ້າໃນການເຄື່ອນ ໄຫວວຽກງານການສຶກສາ ເພື່ອເປັນການສະໜັບສະໜູນການພັດທະນາເຍົາວະຊົນຂອງຊາດ ກໍ່ຄືຊັບພະຍາກອນບຸກຄົນທີ່ຈະປະກອບສ່ວນ ໃນການພັດທະນາປະເທດຊາດໃນພາຍພາກໜ້າ.