ຜ-ຟຟລ ຮັບລາງວັນ IFR Asia Awards 2015

ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຮັບລາງວັນ International Financing Review (IFR) Asia Awards ປະຈໍາປີ 2015 ໃນສາຂາ Frontier Markets Issue ຫຼື ການລະດົມທຶນຜ່ານການອອກຈໍາໜ່າຍຫຼັກຊັບດີເດັ່ນຈາກບັນດາຕະຫຼາດທຶນເກີດໃໝ່ ເຊິ່ງມີພິທີມອບຮັບ​ຈັດຂຶ້ນໃນວັນທີ 24/02/2016 ທີ່ປະເທດຮົງກົງ ຈັດໂດຍ IFR Asia ເຊິ່ງເປັນວາລະສານດ້ານຕະຫຼາດທຶນທີ່ນໍາໜ້າແລະມີຊື່ສຽງໃນອາຊີ. ລາງວັນດັ່ງກ່າວ ເປັນລາງວັນລະດັບພາກພື້ນອາຊີ ທີ່ໄດ້ມອບໃຫ້ ຜ-ຟຟລ ເພື່ອຮັບຮູ້ເຖິງຜົນສໍາເລັດອັນພົ້ນເດັ່ນຂອງການລະດົມທຶນຜ່ານການອອກຮຸ້ນກູ້ຂອງ ຜ-ຟຟລ ໃນຕະຫຼາດພັນທະບັດຫຼືຮຸ້ນກູ້ຂອງປະເທດໄທ ໃນທ້າຍປີ 2014.

ການລະດົມທຶນດັ່ງກ່າວ ເປັນບາດກ້າວບຸກທະລຸອັນໃໝ່ໃນຍຸດທະສາດການເຂົ້າເຖິງແຫຼ່ງທຶນຂອງ ຜ-ຟຟລ ເຊິ່ງສະແດງອອກຜ່ານການນໍາໃຊ້ຜົນການຈັດລໍາດັບຄວາມໜ້າເຊື່ອຖືຂອງບໍລິສັດ ຫຼື credit rating ເພື່ອເຂົ້າເຖິງແຫຼ່ງທຶນໃນຕະຫຼາດທຶນຂອງອາຊຽນ ໂດຍບໍ່ມີການຄໍ້າປະກັນຈາກລັດຖະບານ. ຜ-ຟຟລ ສາມາດລະດົມທຶນໄດ້ທັງໝົດ 6.500 ລ້ານບາດ ຕາມຄາດໝາຍ ຜ່ານການອອກຮຸ້ນກູ້ໄລຍະ 5 ປີ, 7 ປິ ແລະ 10 ປີ ດ້ວຍຕົ້ນທຶນທີ່ເໝາະສົມ ເຊິ່ງມີອັດຕາດອກເບ້ຍຮຸ້ນກູ້ 4,95%, 5,20% ແລະ 5,45% ຕໍ່ປີ ຕາມລໍາດັບ. ເງິນທຶນດັ່ງກ່າວນີ້ ໄດ້ຖືກນໍາໃຊ້ຕາມເປົ້າໝາຍການນໍາໃຊ້ທຶນ ຄືເພື່ອລົງທຶນເຂົ້າໃນການຂະຫຍາຍກໍາລັງຕິດຕັ້ງໄຟຟ້າຂອງ ຜ-ຟຟລ ເພີ່ມຕື່ມຈໍານວນ 392 ເມກາວັດ ຜ່ານການຮັບໂອນ 4 ໂຄງການໄຟຟ້າຈາກ ລັດວິສາຫະກິດໄຟຟ້າລາວ (ຟຟລ) ແລະ ການເຂົ້າຖືຮຸ້ນໃນ 5 ໂຄງການຜະລິດໄຟຟ້າເອກະລາດ ຫຼື IPP.

IFR Asia ໄດ້ຂຽນບົດຄວາມໄວ້ວ່າ ຜ-ຟຟລ ໄດ້ກາຍເປັນບໍລິສັດລາວທໍາອິດ ທີ່ໄດ້ລະດົມທຶນຜ່ານການອອກຮຸ້ນກູ້ຢູ່ຕ່າງປະເທດ ໂດຍວ່າອັດຕາດອກເບ້ຍຮຸ້ນກູ້ດັ່ງກ່າວ ໄດ້ປະກອບສ່ວນໃນການສ້າງເສັ້ນອັດຕາຜົນຕອບແທນຂອງຮຸ້ນກູ້ (Benchmark Yield Curve) ເພື່ອເປັນພື້ນຖານການກໍານົດຕົ້ນທຶນຂອງຮຸ້ນກູ້ໃຫ້ແກ່ພາກທຸລະກິດຂອງ ສປປ ລາວ.

ທ່ານ ບຸນອູ້ມ ສີວັນເພັງ, ຜູ້ອໍານວຍການໃຫຍ່ ຜ-ຟຟລ ພ້ອມດ້ວຍ ທ່ານຮອງຜູ້ອໍານວຍການໃຫຍ່ ສາຍງານການເງິນ ແລະ ຜູ້ອໍານວຍການຝ່າຍບໍລິຫານງານແລະສະໜັບສະໜູນອົງກອນ ເປັນຕາງໜ້າ ຜ-ຟຟລ ເຂົ້າຮ່ວມພິທີຮັບລາງວັນໃນຄັ້ງນີ້. ພ້ອມກັນນີ້ ທ່ານກົງສູນໃຫຍ່ ສປປ ລາວ ປະຈໍາຮົງກົງ ຍັງໄດ້ໃຫ້ກຽດເຂົ້າຮ່ວມງານເພື່ອສະແດງຄວາມຍິນດີອີກດ້ວຍ.

ລາງວັນ IFR Asia Awards ເປັນພາກສ່ວນໜຶ່ງຂອງ Thomson Reuters Awards for Excellence ເພື່ອເປັນການຮັບຮູ້ແລະຍ້ອງຍໍຊົມເຊີຍຜົນສໍາເລັດອັນພົ້ນເດັ່ນຂອງບັນດາບໍລິສັດແລະບຸກຄົນໃນຕະຫຼາດການເງິນໂລກ.