ພິທີການເຊັນສັນຍາກໍ່ສ້າງໂຄງການ ເຂື່ອນໄຟຟ້ານໍ້າບີ

ໃນເວລາ 5 ໂມງແລງ ຂອງ ວັນທີ 18 ພະຈິກ 2015; ໄດ້ມີພິທີການລົງນາມເຊັນສັນຍາ ກໍ່ສ້າງໂຄງການ ເຂື່ອນໄຟຟ້ານໍ້າບີ ລະຫວ່າງ ບໍລິສັດ ນໍ້າບີ ພາວເວີ ຈໍາກັດ ແລະ ບໍລິສັດ ພາວເວີໄຊນາ ເສີນຕູ່ ເອັນຈິເນຍຣິງ ຄໍເປີເຣຊັນ ຈໍາກັດ. ພິທີ່ດັ່ງກ່າວໄດ້ຈັດຂຶ້ນຢູ່ທີ່ ຫ້ອງປະຊຸມຂອງໂຮງແຮມແລນມາກ ໂດຍມີຕາງໜ້າການເຊັນສັນຍາລົງນາມ ຈາກ ບໍລິສັດ ນໍ້າບີ ພາວເວີ ຈໍາກັດ ໂດຍ ທ່ານ ດຣ. ບຸນສະຫລອງ ສຸດທິດາຣາ, ປະທານສະພາບໍລິຫານບໍລິສັດ ນໍ້າບີ ພາວເວີຈໍາກັດ ແລະ ຕາງໜ້າຈາກ ບໍລິສັດ ພາວເວີໄຊນາ ເສິນຕູ່ ເອັນຈິເນຍຣິງ ຄໍເປີເຣຊັນ ຈໍາກັດ ໂດຍ ທ່ານ ຈາງ ຈ້ຽນ ເຢວ້ ປະທານ ແລະ ຜູ້ອໍານວຍການໃຫຍ່ ບໍລິສັດ ພາວເວີໄຊນາ ເສິນຕູ່ ເອັນຈິເນຍຣິງ ຄໍເປີເຣຊັນ ຈໍາກັດ. ໃນພິທີດັ່ງກ່າວ ຍັງໄດ້ມີການເຂົ້າຮ່ວມເປັນສັກຂີພະຍານ ໂດຍ ທ່ານ ດຣ. ຄໍາມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່, ທ່ານ ເຫຼັກໄຫຼ ສີວິໄລ ຮອງເຈົ້າແຂວງ ແຂວງເຊກອງ, ທ່ານ ກວນ ຮົວບິນ ເອກອັກຄະລັດຖະທູດ ແຫ່ງ ສປ. ຈີນ ປະຈໍາ ສປປ. ລາວ, ພ້ອມທັງບັນດາແຂກທີ່ທີກຽດຈາກບັນດາກົມ, ກະຊວງຕ່າງໆ, ແລະ ອົງການຈັດຕັ້ງທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໂຄງການກໍ່ສ້າງເຂື່ອນໄຟຟ້ານໍ້າບີ ເຊິ່ງເປັນເຂື່ອນໄຟຟ້ານໍ້າຕົກທີ່ມີທີ່ຕັ້ງຢູ່ທີ່ ເມືອງ ດາກຈຶງ, ແຂວງ ເຊກອງ; ເຊິ່ງຈະໃຊ້ເວລາດໍາເນີນການກໍ່ສ້າງເປັນເວລາ 5 ປີ ແລະ ຕົກເປັນມູນຄ່າທັງໝົດ 272 ລ້ານໂດລາສະຫະລັດ. ພາຍຫຼັງການກໍ່ສ້າງສໍາເລັດແລ້ວ, ເຂື່ອນໄຟຟ້ານໍ້າບີ ຈະມີກໍາລັງຕິດຕັ້ງການຜະລິດ ທັງໝົດ 135 ເມກາວັດ ເຊິ່ງຈະສາມາດຜະລິດພະລັງງານໄຟຟ້າໄດ້ເຖິງ 680 ກິກາວັດໂມງຕໍ່ປີ ແລະ ຈໍາໜ່າຍໃຫ້ແກ່ ລັດວິສາຫະກິດໄຟຟ້າລາວ ເພື່ອສົ່ງຈໍາໜ່າຍພາຍໃນປະເທດ.

ບໍລິສັດ ນໍ້າບີ ພາວເວີ ຈໍາກັດ ຖືກສ້າງຕັ້ງຂຶ້ນ ພາຍໃຕ້ການຮ່ວມທຶນລະຫວ່າງ ບໍລິສັດ ຜະລິດ-ໄຟຟ້າລາວ ມະຫາຊົນ (80%) ແລະ ບໍລິສັດ ຈັນຖາວອນ ກໍ່ສ້າງ ແລະ ສ້ອມແປງ ຂົວທາງ ຈໍາກັດ (20%) ເພື່ອສໍາປະທານໂຄງການເຂື່ອນໄຟຟ້ານໍ້າບີ ໃນຮູບແບບການກໍ່ສ້າງ, ເປັນເຈົ້າຂອງ, ແລະ ຄຸ້ມຄອງດໍາເນີນການ (BOT) ແລະ ພາຍຫຼັງໝົດອາຍຸການສໍາປະທານແລ້ວ ກໍຈະໂອນມອບໃຫ້ຄືນແກ່ລັດຖະບານໂດຍບໍ່ຄິດຄ່າ. ເຊິ່ງໃນການກໍ່ສ້າງແມ່ນຈະຖືກຮັບເໝົາໃນການກໍ່ສ້າງທັງໝົດໂດຍ ບໍລິສັດ ພາວເວີໄຊນາ ເສີນຕູ່ ເອັນຈິເນຍຣິງ ຄໍເປີເຣຊັນ ຈໍາກັດ ເຊິ່ງເປັນບໍລິສັດທີ່ມີປະສົບການຍາວນານໃນວຽກງານວິສະວະກໍາ ທີ່ນອນຢູ່ໃນແຖວໜ້າຂອງ ສປ. ຈີນ.

ເຂື່ອນໄຟຟ້ານໍ້າບີໃນເມື່ອກໍ່ສ້າງສໍາເລັດແລ້ວ ຈະເປັນໂຄງການທີ່ມີການປະກອບສ່ວນໃນການສ້າງສາພັດທະນາປະເທດຊາດ ແລະ ຫຼຸດຜ່ອນຄວາມທຸກຍາກ ພ້ອມທັງປັບປຸງຊີວິດການເປັນຢູ່ຊອງປະຊາຊົນລາວບັນດາເຜົ່າ ໂດຍສະເພາະ ຢູ່ທີ່ແຂວງເຊກອງ ໃຫ້ດີຂຶ້ນ ທັງເຮັດໃຫ້ການພັດທະນາ ທາງດ້ານເສດຖະກິດ – ສັງຄົມ ຂອງປະເທດລາວ ໃຫ້ນັບມື້ນັບກ້າວເຂົ້າສູ່ຄວາມສີວິໄລ.