ຜ-ຟຟລ ຈັດພິທີ ປູກຕົ້ນໄມ້ ແລະ ປ່ອຍປາ ປະຈໍາປີ 2015

ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ຈັດພິທີ ປູກຕົ້ນໄມ້ ແລະ ປ່ອຍປາ ເນື່ອງໃນໂອກາດ ວັນປູກຕົ້ນໄມ້ແຫ່ງຊາດ ວັນທີ 01 ມິຖຸນາ ຢູ່ທີ່ບໍລິເວນເຂື່ອນໄຟຟ້ານ້ຳສະນາ, ເມືອງ ກາສີ, ແຂວງ ວຽງຈັນ ໃນວັນທີ 02 ມິຖຸນາ 2015.

ໃນພິທີດັ່ງກ່າວ ຜ-ຟຟລ ໄດ້ຈັດສັນເບ້ຍໄມ້ ຈຳນວນ 1.000 ເບ້ຍ ປູກໃນພື້ນທີ່ 2,2 ເຮັກຕາ ເພື່ອເປັນການປົກປັກຮັກສາສິ່ງແວດລ້ອມ ພ້ອມທັງອະນຸລັກຮັກສາຊີວະນາໆພັນ ເພື່ອຄວາມອຸດົມສົມບູນຂອງທຳມະຊາດໃຫ້ມີຄວາມຍືນຍົງ. ໂອກາດດັ່ງກ່າວ ຜ-ຟຟລ ຍັງໄດ້ ປ່ອຍປາ ຈຳນວນ 20.000 ໂຕ ລົງສູ່ທ້າຍໂຮງຈັກ ຂອງເຂື່ອນໄຟຟ້າດັ່ງກ່າວ.

ໃນພິທີ ເປັນກຽດໃນການເປັນປະທານໂດຍ ທ່ານ ດຣ. ຄຳມະນີ ອິນທິລາດ ລັດຖະມົນຕີຊ່ວຍວ່າການ ກະຊວງພະລັງງານ ແລະ ບໍ່ແຮ່ ພ້ອມທັງເປັນ ປະທານສະພາບໍລິຫານ ຜ-ຟຟລ, ນອກນັ້ນ ຍັງມີການເຂົ້າຮ່ວມເປັນສັກຂີພະຍານ ຈາກອໍານາດການປົກຄອງທ້ອງຖິ່ນ ໂດຍ ທ່ານ ບຸນມີ ພຸດທະວົງ ຮອງເຈົ້າແຂວງ ແຂວງວຽງຈັນ; ພ້ອມດ້ວຍ ພະນັກງານ ກຳມະກອນ ຜ-ຟຟລ, ອຳນາດການປົກຄອງທ້ອງຖິ່ນ ແລະ ປະຊາຊົນ ເຂົ້າຮ່ວມ.

ເນື່ອງໃນໂອກາດດັ່ງກ່າວ ຜ-ຟຟລ ຍັງໄດ້ ມອບອຸປະກອນ ການສຶກສາ ແລະ ກິລາ ຮວມມູນຄ່າກວ່າ 14 ລ້ານກີບ ມອບໃຫ້ແກ່ໂຮງຮຽນປະຖົມສົມບູນບ້ານນາຊູ ເມືອງກາສີ ແຂວງວຽງຈັນ ເພື່ອນຳໃຊ້ເຂົ້າໃນການເຄື່ອນໄຫວວຽກງານ ການສຶກສາ ໃຫ້ນັບມື້ນັບດີຂຶ້ນ; ພ້ອມນັ້ນ ຍັງໄດ້ມອບອຸປະກອນຄອມພິວເຕີ ໃຫ້ແກ່ ອໍານາດການປົກຄອງເມືອງກາສີ ເພື່ອໄວ້ໃຊ້ໃນການປະຕິບັດວຽກງານປະຈໍາວັນອີກດ້ວຍ.